ಕಲಘಟಗಿ: ಕಬ್ಬು ಬೆಳೆಗಾರರ ದರ ನಿಗದಿ ವಿಚಾರದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವರು ಹಾಗೂ ಸ್ಥಳೀಯ ಶಾಸಕರಾದ ಸಂತೋಷ ಲಾಡ್ ಅವರೇ ಖುದ್ದಾಗಿ ಬೆಂಗಳೂರಿನಲ್ಲಿ ಸಭೆ ನಡೆಸಿ ಆದೇಶ ನೀಡಿದ್ದರೂ, ಹಳಿಯಾಳ ಸಕ್ಕರೆ ಕಾರ್ಖಾನೆಯ ಆಡಳಿತ ಮಂಡಳಿ (ಎಂಡಿ) ಆ ಆದೇಶವನ್ನು ಗಾಳಿಗೆ ತೂರಿದೆ. ಇದರಿಂದಾಗಿ ರೈತರಿಗೆ ನ್ಯಾಯ ಸಿಕ್ಕರೂ ಅದನ್ನು ಜಾರಿ ಮಾಡುವವರು ಇಲ್ಲದಂತಾಗಿ, ‘ದೇವರು ವರ ಕಟ್ಟರೂ ಪೂಜಾರಿ ವರ ಕೊಡಲಿಲ್ಲ’ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ. ಸಚಿವರ ಸೂಚನೆಗೂ ಬೆಲೆ ಕೊಡದೆ, ನಿರಂತರವಾಗಿ ಕಬ್ಬು ಕಟಾವು ಮುಂದುವರೆಸಿರುವ ಕಾರ್ಖಾನೆಯ ಎಂಡಿಯನ್ನು ತಕ್ಷಣ ಬಂಧಿಸಿ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ರೈತ ಸಂಘಟನೆಗಳು ರಸ್ತೆ ತಡೆ ಮೂಲಕ ಪ್ರತಿಭಟನೆ ನಡೆಸಿ ಕಲಘಟಗಿ ತಹಶೀಲ್ದಾರ್ ಹಾಗೂ ಸಿಪಿಐ ಅವರಿಗೆ ಮನವಿ ಸಲ್ಲಿಸಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿವೆ.
ಕಬ್ಬಿನ ದರ ನಿಗದಿ ಆಗದೆ ಕಟಾವು ಆರಂಭಿಸುವ ಕುರಿತು ಕಲಘಟಗಿ ತಹಶೀಲ್ದಾರ್ ಮತ್ತು ಸಿಪಿಐ ಅವರಿಗೆ ದೂರುಗಳು ಬಂದ ಹಿನ್ನೆಲೆಯಲ್ಲಿ, ಪರಿಸ್ಥಿತಿ ನಿಭಾಯಿಸಲು ಜಿಲ್ಲಾ ಉಸ್ತುವಾರಿ ಸಚಿವರಾದ ಸಂತೋಷ ಲಾಡ್ ಅವರೇ ಕಣಕ್ಕೆ ಇಳಿದಿದ್ದರು. ಶಾಸಕರೂ ಆಗಿರುವ ಸಂತೋಷ ಲಾಡ್ ಅವರು ಕಬ್ಬು ಬೆಳೆಗಾರರ ಸಂಘದ ಮುಖಂಡರೊಂದಿಗೆ ಬೆಂಗಳೂರಿನ ವಿಕಾಸಸೌಧದಲ್ಲಿ ಸಭೆ ನಡೆಸಿದ್ದರು. ಈ ಸಭೆಯಲ್ಲಿ, ಹಳಿಯಾಳ ಸಕ್ಕರೆ ಕಾರ್ಖಾನೆಯವರು ರೈತರ ಹಿಂದಿನ ಬಾಕಿ ಮೊತ್ತವನ್ನು ಸಂಪೂರ್ಣವಾಗಿ ಪಾವತಿಸಿ, ನಂತರವೇ ನಮ್ಮ ಮತಕ್ಷೇತ್ರದ ಕಬ್ಬನ್ನು ಕಟಾವು ಮಾಡಿ ತೆಗೆದುಕೊಂಡು ಹೋಗಬೇಕು ಎಂದು ಸ್ಪಷ್ಟ ಸೂಚನೆ ನೀಡಿದ್ದರು. ಸಚಿವರ ಈ ಕ್ರಮ ರೈತರಲ್ಲಿ ಭರವಸೆ ಮೂಡಿಸಿತ್ತು.
ಆದರೆ, ಜಿಲ್ಲಾ ಉಸ್ತುವಾರಿ ಸಚಿವರು ಮತ್ತು ಶಾಸಕರ ಈ ಆದೇಶಕ್ಕೆ ಹಳಿಯಾಳ ಸಕ್ಕರೆ ಕಾರ್ಖಾನೆಯು ಕಿಂಚಿತ್ತೂ ಮನ್ನಣೆ ನೀಡಿಲ್ಲ. ಕಾರ್ಖಾನೆಯವರು ಕಬ್ಬು ಬೆಳೆಗಾರರೊಂದಿಗೆ ದ್ವಿಪಕ್ಷೀಯ ಒಪ್ಪಂದ ಮಾಡಿಕೊಳ್ಳುವ ಪ್ರಕ್ರಿಯೆಯನ್ನೂ ಪೂರ್ಣಗೊಳಿಸದೆ, ತಮ್ಮ ಇಷ್ಟದಂತೆ ಕೇವಲ ₹3050 ಅನ್ನು ದರವಾಗಿ ನಿಗದಿ ಮಾಡಿದ್ದಾರೆ. ಕಾರ್ಖಾನೆಯ ಈ ಏಕಪಕ್ಷೀಯ ನಿರ್ಧಾರವನ್ನು ಕಬ್ಬು ಬೆಳೆಗಾರರ ಸಂಘಟನೆಗಳು ಒಕ್ಕೊರಲಿನಿಂದ ತಿರಸ್ಕರಿಸಿವೆ. ರೈತರಿಗೆ ಮಾಡಿದ ಈ ಮೋಸಕ್ಕೆ ಇಂಬು ನೀಡುವಂತೆ, ಕಾರ್ಖಾನೆಯ ಮುಖ್ಯಸ್ಥರಾದ ವಿ.ಪಿ. ಕೊಣಕೇರಿ ಅವರು ಯಾವುದೇ ಬೆಲೆ ನಿಗದಿ ಒಪ್ಪಂದ ಮಾಡಿಕೊಳ್ಳದೆ ನಿರಂತರವಾಗಿ ಹತ್ತು ದಿನಗಳಿಂದ ಕಬ್ಬು ಕಟಾವನ್ನು ಚಾಲನೆ ಮಾಡಿಸಿದ್ದಾರೆ. ಇದು ಸ್ಪಷ್ಟವಾಗಿ ಸಚಿವರ ಆದೇಶದ ಉಲ್ಲಂಘನೆ ಮತ್ತು ರೈತ ಸಂಘಟನೆಗಳ ಹಕ್ಕೊತ್ತಾಯಗಳ ನಿರ್ಲಕ್ಷ್ಯವಾಗಿದೆ.
ರೈತರ ನಂಬಿಕೆ ಮತ್ತು ಸಚಿವರ ಆದೇಶ ಎರಡನ್ನೂ ಗಾಳಿಗೆ ತೂರಿದ ಹಳಿಯಾಳ ಸಕ್ಕರೆ ಕಾರ್ಖಾನೆಯ ಆಡಳಿತ ಮಂಡಳಿಯ ವಿರುದ್ಧ ತಕ್ಷಣ ಕ್ರಮ ತೆಗೆದುಕೊಳ್ಳಬೇಕು ಎಂದು ರೈತರು ಆಗ್ರಹಿಸಿದ್ದಾರೆ. ಮನವಿ ಪತ್ರದಲ್ಲಿ “ತಕ್ಷಣವೇ ಹಳಿಯಾಳ ಸಕ್ಕರೆ ಕಾರ್ಖಾನೆಯ ಎಂಡಿಯವರನ್ನು ಬಂಧಿಸಿ, ಅವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು” ಎಂದು ಆಗ್ರಹಿಸಲಾಗಿದೆ.
ಒಟ್ಟಿನಲ್ಲಿ, ರಾಜ್ಯ ಸರ್ಕಾರದ ಪ್ರತಿನಿಧಿಯ ಸೂಚನೆಗೆ ಬೆಲೆ ಕೊಡದೆ ರೈತರನ್ನು ಸಂಕಷ್ಟಕ್ಕೆ ದೂಡಿರುವ ಕಾರ್ಖಾನೆಯ ಕ್ರಮವು ಜಿಲ್ಲೆಯಲ್ಲಿ ತೀವ್ರ ರಾಜಕೀಯ ಮತ್ತು ರೈತ ಆಂದೋಲನಕ್ಕೆ ಕಾರಣವಾಗುವ ಸಾಧ್ಯತೆ ಇದೆ.
ಈ ಸಂದರ್ಭದಲ್ಲಿ ಮಹೇಶ ಬೆಳಗಾವಂಕರ, ಉಳುವಪ್ಪ ಬಳಿಗೇರ, ಪರಶುರಾಮ ಎತ್ತಿನಗುಡ್ಡ, ಚನ್ನಬಸಪ್ಪ ಹುಲಿಮನಿ, ಶೇಖಪ್ಪ ದಾಸ್ತಿಕೊಪ್ಪ, ನಿಂಗಪ್ಪ ನಾಗನೂರ, ಸಹದೇವಪ್ಪ ಕುಂಬಾರ, ಯಲ್ಲಪ್ಪ ತಳವಾರ, ಸಂಗಯ್ಯ ಹಿರೇಮಠ, ಶಿವಪ್ಪ ತಡಸ, ವಿರೂಪಾಕ್ಷಪ್ಪ ಅಂಗಡಿ, ಗುರುಶಿದ್ದಪ್ಪ ಬಂಡಿ, ಮಲ್ಲನಗೌಡ ತಾವರಗೇರಿ ಸೇರಿದಂತೆ ಅನೇಕ ರೈತ ಮುಖಂಡರು ಉಪಸ್ಥಿತರಿದ್ದರು.
