ಧಾರವಾಡ: ಕಾಲಮಿತಿಯೊಳಗೆ ಸರ್ಕಾರಿ ನೌಕರರ ವಿಮಾ ಪಾಲಿಸಿಗಳಿಗೆ ಬೋನಸ್ ಪಾವತಿಸುವ ಮೂಲಕ ಮಾದರಿ ಆಡಳಿತ ಪ್ರದರ್ಶಿಸಿದ ಧಾರವಾಡ ಜಿಲ್ಲಾ ವಿಮಾ ಅಧಿಕಾರಿ ಜೆ.ಸಿ.ಕಠಾರಿ ಅವರನ್ನು ವಿವಿಧ ಇಲಾಖೆಗಳ ಸರ್ಕಾರಿ ನೌಕರರು ಗುರುವಾರ ಅವರ ಕಚೇರಿಯಲ್ಲಿ ಸನ್ಮಾನಿಸಿ ಗೌರವಿಸಿದರು.
ಸಾಮಾನ್ಯವಾಗಿ ವಿಮಾ ಪ್ರಕ್ರಿಯೆಗಳು ವಿಳಂಬವಾಗುವ ಈ ದಿನಗಳಲ್ಲಿ, ಜೆ.ಸಿ.ಕಠಾರಿ ಅವರು ಮತ್ತು ಅವರ ಸಿಬ್ಬಂದಿ ವರ್ಗದವರು ರಜೆ ದಿನಗಳನ್ನು ಲೆಕ್ಕಿಸದೆ, ಪ್ರತಿದಿನ ತಡರಾತ್ರಿಯವರೆಗೂ ಕರ್ತವ್ಯ ನಿರ್ವಹಿಸಿದ್ದಾರೆ. ಇವರ ಈ ಅವಿರತ ಶ್ರಮದ ಫಲವಾಗಿ ಕೇವಲ 15 ದಿನಗಳ ಅಲ್ಪ ಅವಧಿಯಲ್ಲಿ ಸುಮಾರು 2,150 ಸರ್ಕಾರಿ ನೌಕರರ ಖಾತೆಗೆ ವಿಮಾ ಲಾಭಾಂಶ (ಬೋನಸ್) ಜಮೆಯಾಗಿದೆ. ಇಲಾಖೆಯ ಈ ಪಾರದರ್ಶಕ ಮತ್ತು ನೌಕರ ಸ್ನೇಹಿ ಕಾರ್ಯವೈಖರಿಯು ನೌಕರರ ವಲಯದಲ್ಲಿ ಭಾರೀ ಮೆಚ್ಚುಗೆಗೆ ಪಾತ್ರವಾಗಿದೆ.
ಅಧಿಕಾರಿಗಳ ಈ ಜನಪರ ಕಾಳಜಿಯನ್ನು ಗುರುತಿಸಿದ ವಿವಿಧ ಇಲಾಖೆಗಳ ನೌಕರರು, ಸ್ವತಃ ಜಿಲ್ಲಾ ವಿಮಾ ಅಧಿಕಾರಿಯವರ ಕಾರ್ಯಾಲಯಕ್ಕೆ ತೆರಳಿ ಜೆ.ಸಿ.ಕಠಾರಿ ಹಾಗೂ ಅವರ ಸಿಬ್ಬಂದಿ ವರ್ಗಕ್ಕೆ ಶಾಲು ಹೊದಿಸಿ ಕೃತಜ್ಞತೆ ಸಲ್ಲಿಸಿದರು. ಈ ಸಂದರ್ಭದಲ್ಲಿ ಮಾತನಾಡಿದ ನೌಕರರು, “ಜೆ.ಸಿ.ಕಠಾರಿ ಅವರ ಕಾರ್ಯದಕ್ಷತೆ ಮತ್ತು ಸಮಯಪ್ರಜ್ಞೆ ಇತರೆ ಅಧಿಕಾರಿಗಳಿಗೆ ಮಾದರಿಯಾಗಿದೆ. ನೌಕರರ ಸಮಸ್ಯೆಗಳಿಗೆ ಸ್ಪಂದಿಸುವ ಇವರ ವ್ಯಕ್ತಿತ್ವವು ಆಡಳಿತ ವ್ಯವಸ್ಥೆಯ ಮೇಲಿನ ನಂಬಿಕೆಯನ್ನು ಹೆಚ್ಚಿಸಿದೆ” ಎಂದು ಹರ್ಷ ವ್ಯಕ್ತಪಡಿಸಿದರು.
ಈ ಸನ್ಮಾನ ಕಾರ್ಯಕ್ರಮವು ಸರ್ಕಾರಿ ಕಚೇರಿಗಳಲ್ಲಿ ಪ್ರಾಮಾಣಿಕವಾಗಿ ಕೆಲಸ ಮಾಡುವ ಅಧಿಕಾರಿಗಳಿಗೆ ನೌಕರರಿಂದ ಸಿಕ್ಕ ದೊಡ್ಡ ಗೌರವವಾಗಿ ಗಮನ ಸೆಳೆಯಿತು.
