ಧಾರವಾಡ: ಎಲ್ಲರಂತೆ ಬದುಕದೇ, ಎಲ್ಲರಿಗಾಗಿ ಬದುಕಿದ ಸಾರ್ಥಕ ಬದುಕು ಡಾ. ಎಂ.ಎಂ. ಕಲಬುರ್ಗಿಯವರದಾಗಿತ್ತು. ನಿಸ್ವಾರ್ಥ ಮನೋಭಾವದ ಅವರ ಹೃದಯ ಶ್ರೀಮಂತಿಕೆ ಎಷ್ಟು ದೊಡ್ಡದಾಗಿತ್ತೆಂದರೆ, ‘ವಿದ್ಯಾರ್ಥಿಗಳೇ ನನ್ನ ನಿಜವಾದ ವಾರಸುದಾರರು’ ಎಂಬ ಉದಾತ್ತ ಭಾವನೆಯನ್ನು ಅವರು ಹೊಂದಿದ್ದರು” ಎಂದು ಮುಳಗುಂದ ಸರಕಾರಿ ಪ್ರಥಮ ದರ್ಜೆ ಕಾಲೇಜಿನ ಪ್ರಾಚಾರ್ಯ ಡಾ. ಆರ್.ಎಂ. ಕಲ್ಲನಗೌಡರ ಅವರು ಅಭಿಪ್ರಾಯಪಟ್ಟರು.
ಅವರು ಶುಕ್ರವಾರ ಧಾರವಾಡದ ಕಲ್ಯಾಣ ನಗರದ ಹಿರೇಮಲ್ಲೂರ ಈಶ್ವರನ್ ಪದವಿ ಪೂರ್ವ ಕಾಲೇಜಿನಲ್ಲಿ, ಧಾರವಾಡದ ಕವಿವ ಸಂಘವು ಆಯೋಜಿಸಿದ್ದ ಡಾ. ಎಂ.ಎಂ. ಕಲಬುರ್ಗಿ ಸಂಸ್ಮರಣೆ ದತ್ತಿ ಕಾರ್ಯಕ್ರಮದಲ್ಲಿ ‘ಡಾ. ಎಂ.ಎಂ. ಕಲಬುರ್ಗಿ ಜೀವನ ಹಾಗೂ ಸಾಧನೆ’ ಕುರಿತು ಉಪನ್ಯಾಸ ನೀಡಿದರು.
🔍 ಬಹುಶಾಸ್ತ್ರೀಯ ಅಧ್ಯಯನದ ಸತ್ಯಶೋಧಕ
ಡಾ. ಕಲಬುರ್ಗಿಯವರು ಕನ್ನಡ ಪಾಂಡಿತ್ಯ ಪರಂಪರೆಯ ಗಣ್ಯ ವಿದ್ವಾಂಸರು ಹಾಗೂ ಬಹುಶಾಸ್ತ್ರೀಯ ಅಧ್ಯಯನದ ಸತ್ಯಶೋಧಕರಾಗಿದ್ದರು. ಕನ್ನಡ ನಾಡು-ನುಡಿಯ ಗಂಭೀರ ಚಿಂತಕರಾಗಿದ್ದ ಅವರು, ಜಾನಪದ, ಇತಿಹಾಸ, ಸಂಸ್ಕೃತಿ, ಹಸ್ತಪ್ರತಿ, ಶಾಸನ, ಗ್ರಂಥ ಸಂಪಾದನೆ ಮತ್ತು ಸಂಶೋಧನೆಗೆ ಸಂಬಂಧಿಸಿದಂತೆ ನಾನಾ ಕ್ಷೇತ್ರಗಳಲ್ಲಿ ಅವಿಶ್ರಾಂತವಾಗಿ ಕಾರ್ಯ ನಿರ್ವಹಿಸಿದ್ದರು ಎಂದು ಡಾ. ಕಲ್ಲನಗೌಡರ ಸ್ಮರಿಸಿದರು. ಶರಣ ಸಂಸ್ಕೃತಿಯಂತೆ ಬದುಕಿದ ಕಲಬುರ್ಗಿಯವರು ಕಾಯಕ ಸಿದ್ಧಾಂತದಲ್ಲಿ ನಂಬಿಕೆ ಹೊಂದಿದವರಾಗಿದ್ದರು. ಜಾತಿ, ಧರ್ಮ, ಲಿಂಗ ಮತ್ತು ವರ್ಗಗಳನ್ನು ಮೀರಿ ಬೆಳೆದ ಅವರು, ಸ್ಥಳೀಯ ಇತಿಹಾಸ ಪುರುಷರ ಬಗ್ಗೆಯೂ ತಲಸ್ಪರ್ಶ ಅಧ್ಯಯನ ಮಾಡಿದವರಾಗಿದ್ದರು ಎಂದು ಹೇಳಿದರು.
ನಿರಂತರ ಓದುವ ಹವ್ಯಾಸದ ಮೂಲಕ ನಾಡಿಗೆ ಗುರುವಾಗಿ ಮಾರ್ಗದರ್ಶನ ಮಾಡಿದ ಅವರು, ನೂರಕ್ಕೂ ಹೆಚ್ಚು ಕೃತಿಗಳು ಮತ್ತು ಸಹಸ್ರಾರು ಲೇಖನಗಳನ್ನು ಬರೆದು ಕನ್ನಡ ಸಾಹಿತ್ಯವನ್ನು ಶ್ರೀಮಂತಗೊಳಿಸಿದ್ದಾರೆ. ಸೃಜನಶೀಲ ಸಾಹಿತ್ಯದಲ್ಲೂ ಆಸಕ್ತಿ ಹೊಂದಿದ್ದ ಅವರು, ಕರ್ನಾಟಕ ಸರ್ಕಾರ ಪ್ರಕಟಿಸಿದ ವಚನ ಸಾಹಿತ್ಯ ಸಂಪುಟ ಮಾಲೆಗೆ ಪ್ರಧಾನ ಸಂಪಾದಕರಾಗಿ ಕಾರ್ಯ ನಿರ್ವಹಿಸಿದ್ದರು. ಲಿಂ. ಜಗದ್ಗುರು ತೋಂಟದ ಸಿದ್ಧಲಿಂಗ ಶ್ರೀಗಳ ಹಿಂದಿನ ಶಕ್ತಿಯೇ ಡಾ. ಎಂ.ಎಂ. ಕಲಬುರ್ಗಿಯವರಾಗಿದ್ದರು. ಅವರ ದೂರದೃಷ್ಟಿಯ ಫಲವೇ ಇಂದಿನ ಡಾ. ಹಿರೇಮಲ್ಲೂರ ಈಶ್ವರನ್ ಕಾಲೇಜು. ಇಂದು ಅವರು ಭೌತಿಕವಾಗಿ ನಮ್ಮೊಂದಿಗಿಲ್ಲದಿದ್ದರೂ, ಅವರ ಚಿಂತನೆಗಳು ಎಂದೆಂದಿಗೂ ಅಮರ ಎಂದು ಅವರು ನುಡಿದರು.
👨🏫 ಸೋಮಾರಿತನಕ್ಕೆ ಎಂದೂ ಆಶ್ರಯ ನೀಡಲಿಲ್ಲ
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಹಿರೇಮಲ್ಲೂರ ಈಶ್ವರನ್ ಕಾಲೇಜಿನ ಪ್ರಾಚಾರ್ಯ, ದತ್ತಿದಾನಿ ಪ್ರಿ. ಶಶಿಧರ ತೋಡಕರ ಮಾತನಾಡಿ, ಡಾ. ಕಲಬುರ್ಗಿಯವರು ಸೋಮಾರಿತನಕ್ಕೆ ಎಂದೂ ಆಶ್ರಯ ನೀಡುತ್ತಿರಲಿಲ್ಲ. ವಿದ್ಯಾರ್ಥಿಗಳಿಗೆ ಪಠ್ಯ ಮೀರಿದ ಜ್ಞಾನ ಸಂಪತ್ತನ್ನು ಪ್ರಾಧ್ಯಾಪಕರು ನೀಡಬೇಕೆಂದು ಬಯಸಿದವರು ಅವರು. ಪ್ರಾಧ್ಯಾಪಕರು ವಿದ್ಯಾರ್ಥಿಗಳಿಗೆ ವಿದ್ಯೆ ನೀಡಿದರೆ ಸಾಲದು, ಅನ್ನದ ದಾರಿ ತೋರುವಂತಿರಬೇಕು. ಕೆಲಸದ ಬಗ್ಗೆ ನಿಷ್ಠೆಯುಳ್ಳ ಅವರು ಸಮಯ, ಶಕ್ತಿ ಹಾಗೂ ಹಣ ಹೇಗೆ ಯೋಜನಾಬದ್ಧವಾಗಿರಬೇಕು ಎಂಬುದನ್ನು ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ಮಾಡುತ್ತಿದ್ದರು ಎಂದು ಹೇಳಿದರು.
ಶಂಕರ ಕುಂಬಿ ಸ್ವಾಗತಿಸಿದರು, ಶಂಕರ ಹಲಗತ್ತಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ನೀಲಮ್ಮ ಕೋಟಿ ವಂದಿಸಿದರು ಮತ್ತು ಗಾಯತ್ರಿ ಸರ್ದೇಶಪಾಂಡೆ ಪ್ರಾರ್ಥಿಸಿದರು. ಈರಣ್ಣ ಇಂಜನಗೇರಿ ಕಾರ್ಯಕ್ರಮ ನಿರೂಪಿಸಿದರು. ಈ ಸಂದರ್ಭದಲ್ಲಿ ವೀರಣ್ಣ ಒಡ್ಡೀನ, ವಿಜಯ ಕಲಬುರ್ಗಿ, ಡಾ. ವೀರಣ್ಣ ರಾಜೂರ, ಡಾ. ಚಂದ್ರಶೇಖರ ರೊಟ್ಟಿಗವಾಡ, ಬಸಯ್ಯ ಶಿರೋಳ, ಪ್ರೊ. ವಿಭೂತಿ ಸೇರಿದಂತೆ ಮುಂತಾದವರು ಉಪಸ್ಥಿತರಿದ್ದರು.
