ಧಾರವಾಡ: ಕೃಷಿ ವಿಶ್ವವಿದ್ಯಾಲಯದಲ್ಲಿ ನಡೆಯುತ್ತಿರುವ ಕೃಷಿ ಮೇಳಕ್ಕೆ ದಿನದಿಂದ ದಿನಕ್ಕೆ ಜನಸಂಖ್ಯೆ ಗಣನೀಯವಾಗಿ ಹೆಚ್ಚಾಗುತ್ತಿದೆ. ಎರಡನೇ ದಿನವಾದ ಭಾನುವಾರ ದಾಖಲೆ ಸಂಖ್ಯೆಯ ಜನ ಮೇಳಕ್ಕೆ ಭೇಟಿ ನೀಡಿರುವುದು ಕಂಡುಬಂದಿದೆ. ಮೊದಲ ದಿನ 3.65 ಲಕ್ಷ ಜನ ಬಂದಿದ್ದರೆ, ಎರಡನೇ ದಿನ ಭಾನುವಾರ ಬರೋಬ್ಬರಿ 7.74 ಲಕ್ಷ ಜನ ಭೇಟಿ ನೀಡುವ ಮೂಲಕ ಭರ್ಜರಿ ಸ್ಪಂದನೆ ದೊರಕಿದೆ. ಕಳೆದ ವರ್ಷದ ಎರಡನೇ ದಿನ 7.28 ಲಕ್ಷ ಜನ ಭೇಟಿ ನೀಡಿದ್ದರು, ಆದರೆ ಈ ಬಾರಿ ಆ ದಾಖಲೆಯನ್ನು ಸರಿಗಟ್ಟಲಾಗಿದೆ.
ಬೀಜ ಮಾರಾಟದಲ್ಲಿ ಅಲ್ಪ ಇಳಿಕೆ
ಈ ಬಾರಿ ಜನಸಂಖ್ಯೆ ಹೆಚ್ಚಿದ್ದರೂ, ಬೀಜ ಮಾರಾಟದಲ್ಲಿ ಇಳಿಕೆ ಕಂಡುಬಂದಿದೆ. ಕಳೆದ ವರ್ಷ ಎರಡನೇ ದಿನ 61 ಲಕ್ಷ ರೂಪಾಯಿ ಮೌಲ್ಯದ 595 ಕ್ವಿಂಟಾಲ್ ಹಿಂಗಾರು ಬೆಳೆಗಳ ಬೀಜ ಮಾರಾಟವಾಗಿತ್ತು. ಆದರೆ ಈ ವರ್ಷ, ಎರಡನೇ ದಿನ 25.55 ಲಕ್ಷ ರೂಪಾಯಿ ಮೌಲ್ಯದ 265.8 ಕ್ವಿಂಟಾಲ್ ಹಿಂಗಾರು ಬೆಳೆಗಳ ಬೀಜ ಹಾಗೂ 70 ಕೆಜಿ ತರಕಾರಿ ಬೀಜಗಳನ್ನು ಮಾತ್ರ ಮಾರಾಟ ಮಾಡಲಾಗಿದೆ.
ಇಂದು ಸಿಎಂ ಸಿದ್ದರಾಮಯ್ಯ ಭೇಟಿ ನಿರೀಕ್ಷೆ:
ಕೃಷಿ ಮೇಳಕ್ಕೆ ಇಂದು (ಮೂರನೇ ದಿನ) ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಇತರ ಸಚಿವರು ಸೇರಿದಂತೆ ಹಲವು ಗಣ್ಯರು ಭೇಟಿ ನೀಡುವ ನಿರೀಕ್ಷೆಯಿದೆ. ರಾಜ್ಯದ ಪ್ರಮುಖ ರಾಜಕಾರಣಿಗಳ ಭೇಟಿಯಿಂದ ಮೇಳಕ್ಕೆ ಮತ್ತಷ್ಟು ಮಹತ್ವ ಬಂದಿದೆ. ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಜನರ ಸಂಖ್ಯೆಯಿಂದಾಗಿ ವಿಶ್ವವಿದ್ಯಾಲಯದ ಆವರಣದ ರಸ್ತೆಯಲ್ಲಿ ಸಂಚಾರ ದಟ್ಟಣೆ ಕೂಡ ಉಂಟಾಗಿತ್ತು. ಮಳಿಗೆಗಳು, ಜಾನುವಾರು ಮೇಳ ಮತ್ತು ಫಲಪುಷ್ಪ ಪ್ರದರ್ಶನಗಳಲ್ಲಿ ಜನರು ಕಿಕ್ಕಿರಿದು ಸೇರಿದ್ದರು.
ಈ ಮೇಳವು ರೈತರಿಗೆ ಹೊಸ ತಂತ್ರಜ್ಞಾನಗಳು ಮತ್ತು ಪರಿಕರಗಳ ಬಗ್ಗೆ ಮಾಹಿತಿ ಪಡೆಯಲು ಉತ್ತಮ ವೇದಿಕೆಯಾಗಿದೆ.
