ಗಾಜಿಯಾಬಾದ್: ಆನ್ಲೈನ್ ಗೇಮ್ಗಳ ಹುಚ್ಚು ಮತ್ತು ಮೊಬೈಲ್ ವ್ಯಸನವು ಎಷ್ಟು ಭೀಕರ ಪರಿಣಾಮ ಬೀರಬಲ್ಲದು ಎಂಬುದಕ್ಕೆ ಉತ್ತರಪ್ರದೇಶದ ಗಾಜಿಯಾಬಾದ್ನಲ್ಲಿ ನಡೆದ ಈ ಘಟನೆಯೇ ಸಾಕ್ಷಿ. ಬ್ಲೂವೇಲ್ ಮತ್ತು ಮೋಮೋ ಚಾಲೆಂಜ್ನಂತಹ ಪ್ರಾಣಾಪಾಯಕಾರಿ ಆಟಗಳ ಬೆನ್ನಲ್ಲೇ ಈಗ ‘ಕೊರಿಯನ್ ಲವ್ ಗೇಮ್’ ಎಂಬ ಹೊಸ ಮಾಯಾಜಾಲಕ್ಕೆ ಬಲಿಯಾಗಿ ಒಂದೇ ಕುಟುಂಬದ ಮೂವರು ಅಪ್ರಾಪ್ತ ಸೋದರಿಯರು 9ನೇ ಮಹಡಿಯಿಂದ ಜಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಮೃತರನ್ನು ನಿಶಿಕಾ (16), ಪ್ರಾಚಿ (14) ಮತ್ತು ಪಾಖಿ (12) ಎಂದು ಗುರುತಿಸಲಾಗಿದೆ. ಮಂಗಳವಾರ ತಡರಾತ್ರಿ ಸುಮಾರು 2 ಗಂಟೆಯ ಹೊತ್ತಿಗೆ, ಮನೆಯವರೆಲ್ಲರೂ ಗಾಢ ನಿದ್ರೆಯಲ್ಲಿದ್ದಾಗ ನೀರು ಕುಡಿಯುವ ನೆಪದಲ್ಲಿ ಎದ್ದ ಮೂವರೂ ಮಕ್ಕಳು, ಮೊದಲು ತಮ್ಮ ಮೊಬೈಲ್ಗಳನ್ನು ಕಿಟಕಿಯಿಂದ ಹೊರಕ್ಕೆ ಎಸೆದಿದ್ದಾರೆ. ತದನಂತರ ಒಬ್ಬೊಬ್ಬರಾಗಿಯೇ ಅಪಾರ್ಟ್ಮೆಂಟ್ನ 9ನೇ ಮಹಡಿಯಿಂದ ಕೆಳಕ್ಕೆ ಜಿಗಿದಿದ್ದಾರೆ. ದೊಡ್ಡ ಶಬ್ದ ಕೇಳಿ ಧಾವಿಸಿ ಬಂದ ಸ್ಥಳೀಯರು ಮಕ್ಕಳನ್ನು ಆಸ್ಪತ್ರೆಗೆ ಸಾಗಿಸಿದರಾದರೂ, ಅಷ್ಟರಲ್ಲೇ ಅವರು ಕೊನೆಯುಸಿರೆಳೆದಿದ್ದರು.
ಕೊರಿಯನ್ ಸಂಸ್ಕೃತಿಯ ತೀವ್ರ ವ್ಯಾಮೋಹ:
ಕಳೆದ ಎರಡೂವರೆ ವರ್ಷಗಳಿಂದ ಕೋವಿಡ್ ಸಮಯದ ನಂತರ ಈ ಮಕ್ಕಳು ಆನ್ಲೈನ್ ಗೇಮ್ಗಳ ಗೀಳಿಗೆ ಬಿದ್ದಿದ್ದರು ಎನ್ನಲಾಗಿದೆ. ಮೃತ ಬಾಲಕಿಯರು ಭಾರತೀಯ ಸಂಸ್ಕೃತಿಗಿಂತ ಕೊರಿಯನ್ ಸಂಸ್ಕೃತಿಯ ಬಗ್ಗೆ ವಿಪರೀತ ಒಲವು ಹೊಂದಿದ್ದರು. ತಾವು ಭಾರತೀಯರಲ್ಲ, ಬದಲಿಗೆ ‘ಕೊರಿಯನ್ ರಾಜಕುಮಾರಿಯರು’ ಎಂದು ಕರೆಸಿಕೊಳ್ಳಲು ಇಷ್ಟಪಡುತ್ತಿದ್ದರು. ತಮ್ಮ ಕೋಣೆಯ ಗೋಡೆಗಳ ಮೇಲೆಲ್ಲಾ ಕೊರಿಯನ್ ಭಾಷೆ ಮತ್ತು ಚಿತ್ರಗಳನ್ನು ಬಿಡಿಸಿಕೊಂಡಿದ್ದ ಇವರು, ಶಾಲೆಗೆ ಹೋಗುವುದನ್ನೂ ನಿಲ್ಲಿಸಿದ್ದರು. ಈ ಆಟದಲ್ಲಿ ನೀಡಲಾಗುತ್ತಿದ್ದ ಸವಾಲುಗಳನ್ನು ಪೂರೈಸುವ ಭರದಲ್ಲಿ ಅವರು ಈ ಹಂತಕ್ಕೆ ತಲುಪಿದ್ದಾರೆ ಎಂಬ ಶಂಕೆ ವ್ಯಕ್ತವಾಗಿದೆ.
ತಂದೆಯ ಆಕ್ರಂದನ ಮತ್ತು ಡೆತ್ ನೋಟ್:
ಮಕ್ಕಳ ತಂದೆ ಚೇತನ್ ಕುಮಾರ್ ಅವರ ಪ್ರಕಾರ, ಮಕ್ಕಳು ಯಾವಾಗಲೂ ‘ಕೊರಿಯಾ’ಕ್ಕೆ ಹೋಗಬೇಕು ಎನ್ನುತ್ತಿದ್ದರು. ಮನೆಯಲ್ಲಿ ಪರಸ್ಪರ ಕೊರಿಯನ್ ಹೆಸರುಗಳಿಂದಲೇ ಕರೆದುಕೊಳ್ಳುತ್ತಿದ್ದರು. ಪೊಲೀಸರಿಗೆ ಸ್ಥಳದಲ್ಲಿ 8 ಪುಟಗಳ ಡೈರಿ ಪತ್ತೆಯಾಗಿದ್ದು, ಅದರಲ್ಲಿರುವ ಬರಹಗಳು ಬೆಚ್ಚಿಬೀಳಿಸುವಂತಿವೆ. “ನಾವು ಕೊರಿಯನ್ ಸಂಸ್ಕೃತಿಯನ್ನು ಪ್ರೀತಿಸುತ್ತೇವೆ, ಆದರೆ ನಮ್ಮನ್ನು ಅದರಿಂದ ದೂರ ಮಾಡಲಾಗುತ್ತಿದೆ. ಈಗ ನಾವು ಅದನ್ನು ಎಷ್ಟು ಪ್ರೀತಿಸುತ್ತೇವೆಂದು ನಿಮಗೆ ಅರ್ಥವಾಗಿರಬಹುದು” ಎಂದು ಪೋಷಕರನ್ನು ಉದ್ದೇಶಿಸಿ ಬರೆದಿದ್ದಾರೆ. ಪೋಷಕರು ಮೊಬೈಲ್ ವ್ಯಸನದಿಂದ ಮಕ್ಕಳನ್ನು ಹೊರತರಲು ಪ್ರಯತ್ನಿಸಿದ್ದೇ ಈ ಅತಿರೇಕದ ನಿರ್ಧಾರಕ್ಕೆ ಕಾರಣವಾಯಿತೇ ಎಂಬ ಬಗ್ಗೆಯೂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಪೋಷಕರಿಗೊಂದು ಎಚ್ಚರಿಕೆ:
ಈ ಘಟನೆಯು ದೇಶಾದ್ಯಂತ ಪೋಷಕರಲ್ಲಿ ಆತಂಕ ಮೂಡಿಸಿದೆ. ಮಕ್ಕಳು ಏಕಾಏಕಿ ಏಕಾಂತ ಬಯಸುವುದು, ಮೊಬೈಲ್ನಲ್ಲಿ ಅತಿಯಾದ ಸಮಯ ಕಳೆಯುವುದು ಅಥವಾ ವಿಚಿತ್ರ ನಡವಳಿಕೆ ತೋರುತ್ತಿದ್ದರೆ ಕೂಡಲೇ ಎಚ್ಚೆತ್ತುಕೊಳ್ಳಬೇಕು. ದಿನದ ನಿರ್ದಿಷ್ಟ ಸಮಯಕ್ಕಿಂತ ಹೆಚ್ಚು ಕಾಲ ಮೊಬೈಲ್ ಬಳಸಲು ಬಿಡಬೇಡಿ ಮತ್ತು ಅವರು ಯಾವ ರೀತಿಯ ಆ್ಯಪ್ ಅಥವಾ ಗೇಮ್ಗಳಲ್ಲಿ ತೊಡಗಿದ್ದಾರೆ ಎಂಬುದರ ಮೇಲೆ ನಿಗಾ ಇರಿಸಿ ಎಂದು ತಜ್ಞರು ಹಾಗೂ ಪೊಲೀಸ್ ಇಲಾಖೆ ಮನವಿ ಮಾಡಿದೆ. ಈ ಸಂಬಂಧ ರೋಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.
