ಪಬ್ಲಿಕ ಸಮಾಚಾರ ವಿಶೇಷ ವರದಿ

ಗುಳೇದಗುಡ್ಡ / ಬಾಗಲಕೋಟೆ:

ಒಂದೆಡೆ ಕಣ್ಣೀರಾಗಿಸುವ ಭೀಕರ ಬರ, ಇನ್ನೊಂದೆಡೆ ಆಡಳಿತಾರೂಢ ಸರ್ಕಾರ ಮತ್ತು ಜನಪ್ರತಿನಿಧಿಗಳ ಭೀಕರ ನಿಷ್ಕ್ರಿಯತೆ! ಬಾಗಲಕೋಟೆ ಜಿಲ್ಲೆಯ ಗುಳೇದಗುಡ್ಡ ತಾಲೂಕಿನ ಲಿಂಗಾಪುರ ಗ್ರಾಮ ಇಂದು ಭೀಕರ ಬರದ ದವಡೆಗೆ ಸಿಲುಕಿ ಬಿಕೋ ಎನ್ನುತ್ತಿದೆ. ಊರಿಗೆ ಊರೇ ಖಾಲಿಯಾಗುತ್ತಿದ್ದರೂ, ಶಾಸಕರು, ಸಂಸದರು ಮತ್ತು ಸಂಬಂಧಪಟ್ಟ ಅಧಿಕಾರಿಗಳು ನಿದ್ರೆಯಲ್ಲಿದ್ದಾರೆ ಯೇ ಎಂಬ ಸಾರ್ವಜನಿಕ ಆಕ್ರೋಶ ಮುಗಿಲುಮುಟ್ಟಿದೆ.

ಬೀಗ ಬಿದ್ದ ಮನೆಗಳು, ವೃದ್ಧರ ನಿಟ್ಟುಸಿರು:

ಸುಮಾರು 300ಕ್ಕೂ ಹೆಚ್ಚು ಮನೆಗಳು, 2,000ದಷ್ಟು ಜನಸಂಖ್ಯೆ ಹೊಂದಿದ್ದ ಈ ಸಮೃದ್ಧ ಗ್ರಾಮದಲ್ಲೀಗ ಶೇಕಡಾ 80ಕ್ಕೂ ಹೆಚ್ಚು ಜನ ಬದುಕು ಅರಸಿ ಊರು ತೊರೆದಿದ್ದಾರೆ. ಬಿತ್ತಿದ ಬೆಳೆ ಒಣಗಿ ಬೂದಿಯಾಗಿದೆ, ಕೃಷಿ ಕೆಲಸವಿಲ್ಲದೆ ಹೊಟ್ಟೆಗೆ ತಣ್ಣೀರು ಬಟ್ಟೆಯೇ ಗತಿಯಾಗಿದೆ. ಬೇರೆ ದಾರಿಯಿಲ್ಲದೆ ಕುಟುಂಬ ಸಮೇತ ಮಂಗಳೂರು, ಉಡುಪಿ, ಗೋವಾಗಳಿಗೆ ಕೂಲಿ ಅರಸಿ ಗೂಳೆ ಹೋಗಿದ್ದಾರೆ.

ಗ್ರಾಮದಲ್ಲಿ ಇಂದು ಬರೀ ವೃದ್ಧರು ಮತ್ತು ಬೀಗ ಬಿದ್ದ ಮನೆಗಳು ಮಾತ್ರ ಕಣ್ಣಿಗೆ ರಾಚುತ್ತಿವೆ. ಶಾಲಾ ಅಂಗಳದಲ್ಲಿ ಮಕ್ಕಳ ಸದ್ದಿಲ್ಲ, ಪೋಷಕರ ವಲಸೆಯಿಂದ ಮಕ್ಕಳ ಶಿಕ್ಷಣ ಮೊಟಕೊಂಡು ಅವರ ಭವಿಷ್ಯ ಕತ್ತಲಿಗೆ ತಳ್ಳಲ್ಪಟ್ಟಿದೆ. Local ಆರ್ಥಿಕ ವ್ಯವಸ್ಥೆ ಸಂಪೂರ್ಣ ಕುಸಿದುಬಿದ್ದಿದೆ.

‘VB-G RAM G’ ಹೆಸರಿನ ನಾಟಕ: ಬಡವರ ಹೊಟ್ಟೆಗೆ ಹೊಡೆದ ಯೋಜನೆ!

ಬರಗಾಲದ ಸಮಯದಲ್ಲಿ ಬಡವರಿಗೆ ಆಸರೆಯಾಗಬೇಕಿದ್ದ ಉದ್ಯೋಗ ಖಾತರಿ ಯೋಜನೆಯನ್ನು ಸರ್ಕಾರ ‘ವಿಕಸಿತ ಭಾರತ – ಗ್ಯಾರಂಟಿ ಫಾರ್ ರೋಜ್‌ಗಾರ್ ಮತ್ತು ಅಜೀವಿಕಾ ಮಿಷನ್ (VB-G RAM G)’ ಎಂದು ಮರುನಾಮಕರಣ ಮಾಡಲು ತೋರಿಸಿದ ಆಸಕ್ತಿಯನ್ನು ಕೆಲಸ ನೀಡಲು ತೋರಿಸಿಲ್ಲ.

ಯೋಜನೆಯ ರೂಪರೇಖೆಗಳ ಮಾರ್ಪಾಡು, ಅನುದಾನದ ಅಭಾವ ಹಾಗೂ ತಾಂತ್ರಿಕ ಗೊಂದಲಗಳ ನೆಪದಲ್ಲಿ ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ ಕೆಲಸವೇ ಸಿಗದಂತೆ ಮಾಡಲಾಗಿದೆ. ಕೇವಲ ಹೆಸರು ಬದಲಾಯಿಸುವ ಹಮ್ಮಸ್ಸಿನಲ್ಲಿ ಕಾಲಹರಣ ಮಾಡಿ, ಅನುದಾನವಿಲ್ಲದೇ ಯೋಜನೆಗೆ ಬೀಗ ಜಡಿದು, ಬಡವರ ಹೊಟ್ಟೆಗೆ ಕಲ್ಲು ಹಾಕಲಾಗಿದೆ. ಯೋಜನೆಗಳ ಹೆಸರು ಬದಲಾಯಿಸಿದರೆ ಬಡವರ ಹಸಿವು ನೀಗುತ್ತದೆಯೇ? ಎಂದು ಜನಪ್ರತಿನಿಧಿಗಳನ್ನು ಗ್ರಾಮಸ್ಥರು ಖಾರವಾಗಿ ಪ್ರಶ್ನಿಸುತ್ತಿದ್ದಾರೆ.

ಜನಪ್ರತಿನಿಧಿಗಳೇ, ಆಡಳಿತಗಾರರೇ… ನಿಮಗಿದು ನಾಚಿಕೆಗೇಡಿನ ವಿಷಯವಲ್ಲವೇ?

ಮತ ಕೇಳಲು ಕೈಮುಗಿದು ಬರುವ ಜನಪ್ರತಿನಿಧಿಗಳು, ಗ್ರಾಮಸ್ಥರು ಅನ್ನ-ನೀರಿಲ್ಲದೆ ಊರು ತೊರೆಯುವಾಗ ಎಲ್ಲಿದ್ದಾರೆ?

• ಊರಿಗೆ ಊರೇ ಖಾಲಿಯಾಗುತ್ತಿದ್ದರೂ ಅಧಿಕಾರಿಗಳು ಯಾವ ನಿದ್ರೆಯಲ್ಲಿದ್ದಾರೆ?
• ಕೂಲಿ ಕೆಲಸ ಸಿಗದೆ ಜನ ಅನ್ಯರಾಜ್ಯಗಳಿಗೆ ಅಲೆಯುತ್ತಿದ್ದರೆ ನಿಮ್ಮ ‘ವಿಕಸಿತ’ ಮಾದರಿ ಯಾರಿಗಾಗಿ?

ಬಡವರ ಕಣ್ಣೀರು ಒರೆಸಲಾಗದ ಈ ಆಡಳಿತ ವ್ಯವಸ್ಥೆ ಮತ್ತು ಜನಪ್ರತಿನಿಧಿಗಳ ನಿರ್ಲಕ್ಷ್ಯ ಅತ್ಯಂತ ಖಂಡನೀಯ.

ಜನರ ತಕ್ಷಣದ ಆಕ್ರೋಶ ಮತ್ತು ಆಗ್ರಹಗಳು:

• ತುರ್ತು ಬರ ಪರಿಹಾರ: ಬೆಳೆ ಕಳೆದುಕೊಂಡ ರೈತರಿಗೆ ತಕ್ಷಣವೇ ನಷ್ಟ ಪರಿಹಾರ ಹಣ ಬಿಡುಗಡೆ ಮಾಡಬೇಕು.
• ಉದ್ಯೋಗ ಖಾತರಿ ನಿರಂತರ ಜಾರಿ: ನರೇಗಾ / VB-G RAM G ಯೋಜನೆಯಡಿ ತಕ್ಷಣವೇ ಅನುದಾನ ಬಿಡುಗಡೆ ಮಾಡಿ, ಪ್ರತಿ ಕುಟುಂಬಕ್ಕೂ ಗ್ರಾಮದಲ್ಲೇ ನಿರಂತರ ಕೆಲಸ ನೀಡಬೇಕು.
• ಸ್ಥಳೀಯ ಕೈಗಾರಿಕೆಗಳ ಸ್ಥಾಪನೆ: ಗ್ರಾಮೀಣ ಭಾಗದ ವಲಸೆ ತಡೆಯಲು ಸ್ಥಳೀಯವಾಗಿಯೇ ಉದ್ಯೋಗ ಸೃಷ್ಟಿಸುವ ಕೈಗಾರಿಕೆಗಳನ್ನು ತಕ್ಷಣ ಆರಂಭಿಸಬೇಕು.
• ಕುಡಿಯುವ ನೀರು ಮತ್ತು ಮೇವು: ಗ್ರಾಮದಲ್ಲಿ ಕುಡಿಯುವ ನೀರಿನ ಶಾಶ್ವತ ವ್ಯವಸ್ಥೆ ಹಾಗೂ ಜಾನುವಾರುಗಳಿಗೆ ಮೇವಿನ ಬ್ಯಾಂಕ್ ತೆರೆಯಬೇಕು.

ಎಚ್ಚರಿಕೆ:

ಇನ್ನಾದರೂ ಸರ್ಕಾರ, ಸ್ಥಳೀಯ ಶಾಸಕರು ಹಾಗೂ ತಾಲೂಕು/ಜಿಲ್ಲಾಡಳಿತ ತಕ್ಷಣವೇ ಎಚ್ಚೆತ್ತುಕೊಂಡು ಲಿಂಗಾಪುರ ಗ್ರಾಮಕ್ಕೆ ಭೇಟಿ ನೀಡಿ, ಪರಿಹಾರ ತಲುಪಿಸದಿದ್ದರೆ… ಮುಂಬರುವ ದಿನಗಳಲ್ಲಿ ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳಿಗೆ ಗ್ರಾಮಸ್ಥರು ತಕ್ಕ ಪಾಠ ಕಲಿಸುವುದು ನಿಶ್ಚಿತ!