ಬಳ್ಳಾರಿ: ಸಾಮಾನ್ಯವಾಗಿ ಜೈಲು ಎಂದರೆ ಅದು ಕತ್ತಲೆ ಕೋಣೆ, ಅಲ್ಲಿ ಪಶ್ಚಾತಾಪದ ಕಣ್ಣೀರು ಮಾತ್ರ ಹರಿಯುತ್ತದೆ ಎಂಬ ಭಾವನೆ ಎಲ್ಲರಲ್ಲಿದೆ. ಆದರೆ, ಬಳ್ಳಾರಿ ಕೇಂದ್ರ ಕಾರಾಗೃಹದ ಗೋಡೆಗಳು ಈ ಬಾರಿ ಕೇವಲ ಶಿಕ್ಷೆಗೆ ಮಾತ್ರವಲ್ಲ, ಜ್ಞಾನದ ಹಸಿವಿಗೂ ಸಾಕ್ಷಿಯಾಗಿವೆ. ಕೊಲೆ ಪ್ರಕರಣವೊಂದರಲ್ಲಿ ಜೀವಾವಧಿ ಶಿಕ್ಷೆ ಅನುಭವಿಸುತ್ತಿರುವ ಅಶೋಕ್ ಎಂಬ ಕೈದಿ ಇತ್ತೀಚಿನ ಪಿಯುಸಿ ಪರೀಕ್ಷೆಯಲ್ಲಿ ಶೇ.80ರಷ್ಟು ಅಂಕಗಳನ್ನು ಗಳಿಸುವ ಮೂಲಕ ಇಂದಿನ ವಿದ್ಯಾರ್ಥಿ ಲೋಕಕ್ಕೆ ದೊಡ್ಡ ಸಂದೇಶವೊಂದನ್ನು ನೀಡಿದ್ದಾರೆ.
ಇಂದಿನ ಕಾಲದಲ್ಲಿ ಪೋಷಕರು ಕೇಳಿದ್ದನ್ನೆಲ್ಲ ಕೊಡಿಸಿ, ಸಕಲ ಸೌಲಭ್ಯಗಳನ್ನು ಒದಗಿಸಿದರೂ ಓದಿನತ್ತ ಗಮನ ಹರಿಸದ ಸಾವಿರಾರು ವಿದ್ಯಾರ್ಥಿಗಳು ನಮ್ಮ ಮುಂದಿದ್ದಾರೆ. ಮೊಬೈಲ್, ಇಂಟರ್ನೆಟ್ ಹಾಗೂ ಸುಖಜೀವನದ ನಡುವೆ ಸಿಲುಕಿ ಶಿಕ್ಷಣವನ್ನು ನಿರ್ಲಕ್ಷಿಸುವ ಯುವಜನತೆಗೆ, ಈ ಯುವಕನ ಸಾಧನೆ ಒಂದು ಕಪಾಳಮೋಕ್ಷದಂತಿದೆ. ಜೈಲಿನ ಕಠಿಣ ನಿಯಮಗಳು, ಸೀಮಿತ ಸೌಲಭ್ಯ ಹಾಗೂ ಸಮಾಜದ ಹಂಗಿನ ನಡುವೆಯೂ ಮನಸ್ಸಿದ್ದರೆ ಎಂತಹ ಸಾಧನೆ ಮಾಡಬಹುದು ಎಂಬುದನ್ನು ಅಶೋಕ್ ನಿರೂಪಿಸಿದ್ದಾರೆ.
ಪರೀಕ್ಷಾ ಕೇಂದ್ರಕ್ಕೆ ಪೊಲೀಸ್ ಕಾವಲಿನಲ್ಲಿ ಬಂದಾಗ ಸಮಾಜ ನೋಡುವ ದೃಷ್ಟಿ ವಿಭಿನ್ನವಾಗಿತ್ತು. ಆದರೆ, ಆ ನೋಟಗಳಿಗೆ ತಲೆಕೆಡಿಸಿಕೊಳ್ಳದ ಅಶೋಕ್, ತನ್ನ ಹಳೆಯ ತಪ್ಪುಗಳಿಗೆ ಪಶ್ಚಾತಾಪ ಪಡುತ್ತಾ ಕೂರುವ ಬದಲು ಅಕ್ಷರಗಳನ್ನೇ ತನ್ನ ಏಕೈಕ ಮಿತ್ರರನ್ನಾಗಿ ಮಾಡಿಕೊಂಡಿದ್ದರು. ಜೈಲಿನ ಕತ್ತಲ ಕೋಣೆಯಲ್ಲಿ ಕುಳಿತು ಅವರು ಕಂಡಿದ್ದು ಕೇವಲ ಪುಸ್ತಕದ ಅಕ್ಷರಗಳನ್ನಲ್ಲ, ಬದಲಿಗೆ ಗೌರವಯುತವಾಗಿ ಬದುಕಬಲ್ಲ ಒಂದು ಭವಿಷ್ಯದ ಕನಸನ್ನು. ಶಿಕ್ಷೆಯ ಗೋಡೆಗಳು ಅವರ ಜ್ಞಾನದ ಹಸಿವನ್ನು ಕುಂದಿಸುವ ಬದಲು ಮತ್ತಷ್ಟು ಹೆಚ್ಚಿಸಿದ್ದವು ಎಂಬುದಕ್ಕೆ ಅವರು ಪಡೆದ ಅಂಕಗಳೇ ಸಾಕ್ಷಿಯಾಗಿವೆ.
ಈ ಯುವಕನ ಬದಲಾವಣೆಯಲ್ಲಿ ಜೈಲು ಅಧಿಕಾರಿಗಳ ಪ್ರೋತ್ಸಾಹವೂ ಪ್ರಮುಖವಾಗಿದೆ. ಮನುಷ್ಯ ತಪ್ಪು ಮಾಡುವುದು ಸಹಜ, ಆದರೆ ಆ ತಪ್ಪನ್ನೇ ಜೀವನವಾಗಿಸಿಕೊಳ್ಳದೆ ಪರಿವರ್ತನೆಯ ಹಾದಿ ತುಳಿಯಬೇಕು ಎಂಬ ಮಾನವೀಯ ಮೌಲ್ಯ ಇಲ್ಲಿ ಗೆದ್ದಿದೆ. ಸಕಲ ಸೌಕರ್ಯಗಳಿದ್ದೂ ಓದಿನಿಂದ ವಿಮುಖರಾಗುವ ವಿದ್ಯಾರ್ಥಿಗಳು, ಜೈಲಿನ ಅತಂತ್ರ ಸ್ಥಿತಿಯಲ್ಲೂ ಸಾಧನೆ ಮಾಡಿದ ಈ ಯುವಕನನ್ನು ನೋಡಿ ಕಲಿಯಬೇಕಾದ್ದು ಬಹಳಷ್ಟಿದೆ. ಸಾಧಿಸುವ ಛಲವಿದ್ದರೆ ಜೈಲಿನ ಕಬ್ಬಿಣದ ಕಂಬಿಗಳೂ ಅಡ್ಡಿಯಾಗಲಾರವು ಎಂಬುದಕ್ಕೆ ಅಶೋಕ್ ಅವರ ಈ ಫಲಿತಾಂಶವೇ ಒಂದು ‘ಪರಿವರ್ತನೆಯ ಪ್ರಮಾಣಪತ್ರ’ವಾಗಿದೆ.
