ಚಂಡೀಗಢ: ಭಾರತೀಯ ಮದುವೆ ಎಂದರೆ ಅಲ್ಲಿ ಸಂಭ್ರಮಕ್ಕೆ ಕೊನೆಯಿರುವುದಿಲ್ಲ. ತಮ್ಮ ಶಕ್ತಿಗನುಗುಣವಾಗಿ ಪ್ರತಿಯೊಬ್ಬರೂ ಮದುವೆಯನ್ನು ಅದ್ದೂರಿಯಾಗಿ, ಅಚ್ಚುಕಟ್ಟಾಗಿ ಮಾಡಲು ಪ್ರಯತ್ನಿಸುತ್ತಾರೆ. ಆದರೆ ಪಂಜಾಬ್ನಲ್ಲಿ ನಡೆದ ಈ ವಿವಾಹ ಮಹೋತ್ಸವವು ಇಡೀ ದೇಶವೇ ಬೆಚ್ಚಿಬೀಳುವಂತೆ ಮಾಡಿದೆ. ಮದುವೆ ಮಂಟಪದಲ್ಲಿ ವಧುವಿನ ಮೇಲೆ ಹೂವಿನಂತೆ ನೋಟುಗಳನ್ನು ಚೆಲ್ಲುವ ಮೂಲಕ ವರನ ಕುಟುಂಬಸ್ಥರು ಬರೋಬ್ಬರಿ 8.5 ಕೋಟಿ ರೂಪಾಯಿ ನಗದು ಹಣವನ್ನು ಮಳೆಗರೆದಿದ್ದಾರೆ!
ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆದ ವಿಡಿಯೋ
ಸದ್ಯ ಇಂಟರ್ನೆಟ್ನಲ್ಲಿ ಸದ್ದು ಮಾಡುತ್ತಿರುವ ಈ ವಿಡಿಯೋದಲ್ಲಿ, ಮದುವೆಯ ಮಂಟಪದಲ್ಲಿ ನವವಧು ಕುಳಿತಿರುವುದನ್ನು ಕಾಣಬಹುದು. ಈ ವೇಳೆ ವರನ ಕಡೆಯವರು ಬಂಡಲ್ ಬಂಡಲ್ ನೋಟುಗಳನ್ನು ತಂದು ಆಕೆಯ ಮೇಲೆ ಹೂವಿನ ಮಳೆಯಂತೆ ಸುರಿಸುತ್ತಿದ್ದಾರೆ. ಮಂಟಪದ ತುಂಬೆಲ್ಲಾ ಕೇವಲ ಹಣವೇ ಕಾಣಿಸುತ್ತಿದ್ದು, ಈ ದೃಶ್ಯ ನೋಡುಗರ ಕಣ್ಣು ಕುಕ್ಕುವಂತಿದೆ. ಮದುವೆಗೆ ಬಂದಿದ್ದ ಅತಿಥಿಗಳು ಕೂಡ ಈ ಶ್ರೀಮಂತಿಕೆಯ ಪ್ರದರ್ಶನ ನೋಡಿ ದಂಗಾಗಿದ್ದಾರೆ. ವಿಶೇಷವಾಗಿ ನೆಲದ ಮೇಲೆ ಬಿದ್ದಿರುವ 500 ಹಾಗೂ 200 ರೂಪಾಯಿ ಮುಖಬೆಲೆಯ ನೋಟುಗಳು ನೋಡುಗರ ಕಣ್ಣು ಸೆಳೆಯುತ್ತಿವೆ.
ನಮ್ಮನ್ನು ಕರೆಯಬಾರದೇ? ನೆಟ್ಟಿಗರ ಮಜಾ ಕಮೆಂಟ್ಸ್
ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ಸಾರ್ವಜನಿಕರು ತರಹೇವಾರಿ ಪ್ರತಿಕ್ರಿಯೆ ನೀಡುತ್ತಿದ್ದಾರೆ. “ಈ ಮದುವೆಗೆ ನಮ್ಮನ್ನೂ ಕರೆಯಬಾರದೇ? ನಾವು ಊಟ ಬಡಿಸುವ, ಅತಿಥಿಗಳಿಗೆ ಸತ್ಕಾರ ನೀಡಲು ಸಹಾಯ ಮಾಡುತ್ತಿದ್ದೆವು. ಕೊನೆಯಲ್ಲಿ ನವ ಜೋಡಿಗಳಿಗೆ ಆಶೀರ್ವಾದ ಮಾಡಿ, ನೀವು ಬೇಡ ಎಂದು ಎಸೆದ ಸ್ವಲ್ಪ ನೋಟುಗಳನ್ನು ಹೆಕ್ಕಿಕೊಂಡು ನಮ್ಮ ಪಾಡಿಗೆ ನಾವು ಬರುತ್ತಿದ್ದೆವು” ಎಂದು ಹಲವರು ತಮಾಷೆಯಾಗಿ ಕಮೆಂಟ್ ಮಾಡಿದ್ದಾರೆ. ಇನ್ನು ಕೆಲವರು ನೋಟುಗಳನ್ನು ಹೆಕ್ಕಿ ತಮ್ಮ ಜೇಬಿಗೆ ಹಾಕಿಕೊಳ್ಳುತ್ತಿರುವ ದೃಶ್ಯಗಳೂ ಸದ್ದು ಮಾಡುತ್ತಿವೆ.
8.5 ಕೋಟಿ ರೂಪಾಯಿ ನಗದು ಪೋಲು?
ವರದಿಗಳ ಪ್ರಕಾರ, ಕೇವಲ ಸಂಭ್ರಮದ ನೆಪದಲ್ಲಿ ಮಂಟಪದ ಒಳಗೆ ಹಾರಿಸಿದ ಹಣದ ಮೊತ್ತವೇ ಸುಮಾರು 8.5 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ. ಮದುವೆಯ ಇತರ ಖರ್ಚು ವೆಚ್ಚಗಳು ಇದರ ಹೊರತಾಗಿವೆ. ಪಂಜಾಬ್ನ ಶ್ರೀಮಂತ ಕುಟುಂಬವೊಂದು ಈ ಸಾಹಸಕ್ಕೆ ಕೈಹಾಕಿದ್ದು, ಹಣವನ್ನು ಗಾಳಿಯಲ್ಲಿ ತೂರಿದ ವಿಡಿಯೋ ಈಗ ಸಾರ್ವಜನಿಕ ಚರ್ಚೆಗೆ ಗ್ರಾಸ್ವಾಗಿದೆ.
ಸಾರ್ವಜನಿಕರ ಮಿಶ್ರ ಪ್ರತಿಕ್ರಿಯೆ ಮತ್ತು ಹಿತವಚನ
ಈ ವಿಡಿಯೋ ಕುರಿತು ಸೋಷಿಯಲ್ ಮೀಡಿಯಾದಲ್ಲಿ ಪರ-ವಿರೋಧದ ಚರ್ಚೆಗಳು ಶುರುವಾಗಿವೆ:
- ಒಂದು ವರ್ಗದ ಅಭಿಪ್ರಾಯ: ಇದು ಅವರ ವೈಯಕ್ತಿಕ ಹಣ, ಅವರಿಗೆ ಇಷ್ಟ ಬಂದಂತೆ ಆಚರಿಸುತ್ತಾರೆ ಎಂದು ಕೆಲವರು ಬೆಂಬಲಿಸಿದ್ದಾರೆ.
- ವಿರೋಧ: “ಇದೇ ವೇಳೆ ಕೆಲವರು ಈ ರೀತಿಯ ಶೋಕಿ ಜೀವನ ಒಳ್ಳೆಯದಲ್ಲ. ನಿಮ್ಮಲ್ಲಿ ದುಡ್ಡಿದ್ದರೆ ಮದುವೆ ಖರ್ಚು ಮಾಡಿ, ಆದರೆ ನೋಟು ಚೆಲ್ಲಿ ಅದ್ಧೂರಿತನ, ಶ್ರೀಮಂತಿಕೆ ತೋರ್ಪಡಿಸುವುದು ಉತ್ತಮವಲ್ಲ” ಎಂದು ಸಲಹೆ ನೀಡಿದ್ದಾರೆ. ಇಷ್ಟೊಂದು ಹಣವನ್ನು ಪೋಲು ಮಾಡುವ ಬದಲು ಬಡವರ ಕಲ್ಯಾಣಕ್ಕೆ ಅಥವಾ ದಾನ ಧರ್ಮಕ್ಕೆ ನೀಡಬಹುದಿತ್ತು ಎಂದು ಅನೇಕರು ಆಕ್ರೋಶ ಹೊರಹಾಕಿದ್ದಾರೆ.
ಐಟಿ ಇಲಾಖೆಯ ಕಣ್ಣು ಬೀಳುತ್ತಾ?
ಸಾಮಾನ್ಯವಾಗಿ ಇಷ್ಟು ದೊಡ್ಡ ಪ್ರಮಾಣದ ನಗದು ಹಣವನ್ನು ಸಾರ್ವಜನಿಕವಾಗಿ ಪ್ರದರ್ಶಿಸಿದಾಗ ಆದಾಯ ತೆರಿಗೆ ಇಲಾಖೆ (IT Department) ಗಮನ ಹರಿಸುವ ಸಾಧ್ಯತೆ ಹೆಚ್ಚಿರುತ್ತದೆ. ಈ ಹಿಂದೆ ಕೂಡ ಇಂತಹ ಅದ್ದೂರಿ ಮದುವೆಗಳ ಮೇಲೆ ಐಟಿ ಕಣ್ಣು ಬಿದ್ದಿರುವ ಉದಾಹರಣೆಗಳಿವೆ. ಸದ್ಯಕ್ಕೆ ಈ ಮದುವೆ ನಡೆದ ನಿಖರ ಸ್ಥಳ ಮತ್ತು ಕುಟುಂಬದ ಹಿನ್ನೆಲೆಯ ಬಗ್ಗೆ ಹೆಚ್ಚಿನ ತನಿಖೆ ನಡೆಯುತ್ತಿದೆ ಎನ್ನಲಾಗಿದೆ.
ಒಟ್ಟಿನಲ್ಲಿ, ಪಂಜಾಬ್ನ ಈ ‘ನೋಟಿನ ಮಳೆ’ಯ ಮದುವೆ ಮಾತ್ರ ಈಗ ದೇಶಾದ್ಯಂತ ಭಾರಿ ಸುದ್ದಿಯಾಗುತ್ತಿದೆ. ಈ ಕುಟುಂಬದ ಹಿನ್ನೆಲೆ ಮತ್ತು ಇಷ್ಟೊಂದು ಹಣದ ಮೂಲ ಯಾವುದು ಎಂಬ ಪೂರ್ಣ ವಿವರಗಳು ಶೀಘ್ರದಲ್ಲಿ ಸಿಗಲಿದ್ದು, ಅಲ್ಲಿಯವರೆಗೂ ಕಾದು ನೋಡಬೇಕಿದೆ.
