ಧಾರವಾಡ:ಕರ್ನಾಟಕದ ಶ್ರೇಷ್ಠ ಕೃಷಿ ವಿಜ್ಞಾನಿ ಹಾಗೂ ಧಾರವಾಡ ಕೃಷಿ ವಿಶ್ವವಿದ್ಯಾಲಯಕ್ಕೆ (UAS) ಭದ್ರ ಬುನಾದಿ ಹಾಕಿದ ಪ್ರೊ. ಶಿವರಾಜ ಅಮೃತಪ್ಪ ಹೊಸಮನಿ (ಪ್ರೊ. ಎಸ್.ಎ. ಹೊಸಮನಿ) ಅವರ ಸ್ಮರಣಾರ್ಥ ದತ್ತಿ ಕಾರ್ಯಕ್ರಮವನ್ನು ಇದೇ ಅಕ್ಟೋಬರ್ 8 ರಂದು ಧಾರವಾಡದಲ್ಲಿ ಆಯೋಜಿಸಲಾಗಿದೆ. ಕರ್ನಾಟಕ ವಿದ್ಯಾವರ್ಧಕ ಸಂಘದ ರಾ.ಹ. ದೇಶಪಾಂಡೆ ಸಭಾಭವನದಲ್ಲಿ ಸಂಜೆ 6 ಗಂಟೆಗೆ ಈ ಕಾರ್ಯಕ್ರಮ ನಡೆಯಲಿದೆ ಎಂದು ಸಂಘದ ಪ್ರಧಾನ ಕಾರ್ಯದರ್ಶಿಗಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಪ್ರೊ. ಹೊಸಮನಿ ಅವರ ಸಾಧನೆ
ಪ್ರೊ. ಹೊಸಮನಿ ಅವರು ಹಲವಾರು ಸುಧಾರಿತ ಕೃಷಿ ಉಪಕರಣಗಳನ್ನು ಆವಿಷ್ಕರಿಸಿ ಈ ನಾಡಿನ ಶ್ರೇಷ್ಠ ಕೃಷಿ ವಿಜ್ಞಾನಿಗಳಲ್ಲಿ ಒಬ್ಬರಾಗಿದ್ದರು. ಧಾರವಾಡ ಕೃಷಿ ವಿ.ವಿ.ಯಲ್ಲಿ ಬಿ.ಎಸ್ಸಿ (ಕೃಷಿ) ಪದವಿ ಪಡೆದ ನಂತರ, ಅಮೆರಿಕಾದ ಪೆನ್ಸಿಲ್ವೇನಿಯಾ ವಿಶ್ವವಿದ್ಯಾಲಯದಲ್ಲಿ ಸ್ನಾತಕೋತ್ತರ ಪದವಿ ಗಳಿಸಿದರು. ಧಾರವಾಡ ಕೃಷಿ ವಿ.ವಿ.ಯಲ್ಲಿಯೇ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸಿ ಅಪಾರ ಶಿಷ್ಯ ಬಳಗವನ್ನು ಸೃಷ್ಟಿಸಿದರು. ಬಳ್ಳಾರಿ ಜಿಲ್ಲೆಯ ಕೃಷಿ ಸಂಶೋಧನಾ ಕೇಂದ್ರದ ಫಾರ್ಮ್ ಸೂಪರಿಂಟೆಂಡೆಂಟ್ ಆಗಿ ಕೇಂದ್ರದ ಆದಾಯ ಹೆಚ್ಚಿಸಿದ ಕೀರ್ತಿ ಅವರದಾಗಿದೆ. ವಿಶೇಷವಾಗಿ, ಇವರು ಧಾರವಾಡ ಕೃಷಿ ವಿಶ್ವವಿದ್ಯಾಲಯದ ಪ್ರಥಮ ಆಡಳಿತಾಧಿಕಾರಿಯಾಗಿ ಸಂಸ್ಥೆಯ ಬೆಳವಣಿಗೆಗೆ ಪ್ರಮುಖ ಪಾತ್ರ ವಹಿಸಿದರು.
ಒಣ ಬೇಸಾಯಕ್ಕೆ ಮಹತ್ವದ ಕೊಡುಗೆ
ಬಿಜಾಪುರದ (ಈಗಿನ ವಿಜಯಪುರ) ಒಣ ಬೇಸಾಯ ಸಂಶೋಧನಾ ಕೇಂದ್ರದಲ್ಲಿ ಬೇಸಾಯ ಶಾಸ್ತ್ರಜ್ಞರಾಗಿ ಇವರು ಸಲ್ಲಿಸಿದ ಸೇವೆಯನ್ನು ಪರಿಗಣಿಸಿ 1972ರಲ್ಲಿ ಆರು ತಿಂಗಳ ಹೆಚ್ಚಿನ ವ್ಯಾಸಂಗಕ್ಕಾಗಿ ಅವರನ್ನು ಕೆನಡಾ ದೇಶಕ್ಕೆ ಕಳುಹಿಸಿಕೊಡಲಾಗಿತ್ತು. ಇವರ ಈ ವ್ಯಾಸಂಗದ ಅನುಭವವು, ಬಿಜಾಪುರ ಜಿಲ್ಲೆಯ ರೈತರು ಲಾಭದಾಯಕ ಒಣ ಬೇಸಾಯದಲ್ಲಿ ತೊಡಗಲು ಸಹಕಾರಿಯಾಯಿತು. ಬೆಂಗಳೂರು ಕೃಷಿ ವಿ.ವಿ.ಯ ಜೋಳದ ಬೆಳೆಯ ಬೇಸಾಯ ಶಾಸ್ತ್ರಜ್ಞರಾಗಿ ಇವರು ನೀಡಿದ ಕೊಡುಗೆ ಇಂದಿಗೂ ಸ್ಮರಣೀಯ. ಪ್ರೊ. ಹೊಸಮನಿಯವರು ಶಿಸ್ತಿನ ವ್ಯಕ್ತಿ, ದಕ್ಷ ಆಡಳಿತಾಧಿಕಾರಿ ಹಾಗೂ ವಸ್ತುನಿಷ್ಠ ಪ್ರಾಯೋಗಿಕ ಪ್ರಾಧ್ಯಾಪಕರಾಗಿದ್ದರು.
ಕೃಷಿ ಸಾಹಿತ್ಯ ಮತ್ತು ರೈತ ತರಬೇತಿ
ಇವರು ಕೃಷಿ ಸಾಹಿತಿಯಾಗಿಯೂ ರೈತರಿಗೆ ಉಪಯುಕ್ತವಾಗುವ ಹಲವಾರು ಪುಸ್ತಕಗಳನ್ನು ಹಾಗೂ ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಟ್ಟದ ಸಂಶೋಧನಾ ಲೇಖನಗಳನ್ನು ಬರೆದು ಪ್ರಕಟಿಸಿದ್ದಾರೆ. ನಿವೃತ್ತಿಯ ನಂತರವೂ ನವಲಗುಂದ ತಾಲೂಕಿನ ಇಬ್ರಾಹಿಂಪುರದಲ್ಲಿರುವ ತಮ್ಮ ಸ್ವಗ್ರಾಮದಲ್ಲಿ ಸ್ವಂತ ಕೃಷಿ ಚಟುವಟಿಕೆಗಳಲ್ಲಿ ಹುರುಪಿನಿಂದ ತೊಡಗಿ, ಸುತ್ತಮುತ್ತಲಿನ ರೈತರಿಗೆ ಕಡಿಮೆ ಖರ್ಚಿನಲ್ಲಿ ಲಾಭದಾಯಕ ಒಕ್ಕಲುತನದ ಬಗ್ಗೆ ನಿರಂತರವಾಗಿ ತರಬೇತಿ ನೀಡಿದರು.
ದತ್ತಿ ಸ್ಥಾಪನೆ
ಕೃಷಿ ಕುಟುಂಬದವರಾದ ಪ್ರೊ. ಹೊಸಮನಿ ಅವರು ಶ್ರೀ ಅಮೃತಪ್ಪ ಹೊಸಮನಿ ಮತ್ತು ಶಿವಗಂಗವ್ವ ಅವರ ಸುಪುತ್ರರಾಗಿ 1930ರಲ್ಲಿ ಜನಿಸಿದರು. ಅಕ್ಟೋಬರ್ 8, 1998 ರಂದು ತಮ್ಮ 68ನೇ ವಯಸ್ಸಿನಲ್ಲಿ ನಿಧನರಾದರು. ತಂದೆಯವರಂತೆಯೇ ರೈತ ಪರ ಕಾಳಜಿ ಹೊಂದಿರುವ ಇವರ ಏಕೈಕ ಸುಪುತ್ರ, ರೈತ ಹೋರಾಟಗಾರ ಶ್ರೀ ಈಶ್ವರಚಂದ್ರ ಹೊಸಮನಿ ಅವರು ತಮ್ಮ ತಂದೆಯ ಸ್ಮರಣೆಯಲ್ಲಿ 2015ರಲ್ಲಿ ದತ್ತಿಯನ್ನು ಸ್ಥಾಪಿಸಿದ್ದಾರೆ. ಈ ದತ್ತಿಯ ಅಂಗವಾಗಿ ಪ್ರತಿ ವರ್ಷ ಕೃಷಿಗೆ ಸಂಬಂಧಿಸಿದ ಕಾರ್ಯಕ್ರಮ, ಉಪನ್ಯಾಸಗಳನ್ನು ನಡೆಸಲು ಸಂಘಕ್ಕೆ ಅನುವು ಮಾಡಿಕೊಟ್ಟಿದ್ದಾರೆ.
ಸಾರ್ವಜನಿಕರ ಪಾಲ್ಗೊಳ್ಳುವಿಕೆ
ಕೃಷಿ ಆಸಕ್ತರು, ಶಿಷ್ಯರು ಮತ್ತು ಸಾರ್ವಜನಿಕರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಕೋರಲಾಗಿದೆ. ಹೆಚ್ಚಿನ ಮಾಹಿತಿಗಾಗಿ ಪ್ರೊ. ವಿಜಯಕುಮಾರ ಗಿಡ್ನವರ (ಮೊ: 9480750610) ಅವರನ್ನು ಸಂಪರ್ಕಿಸಬಹುದು.
