ಧಾರವಾಡ: ಪ್ರೀತಿ, ಮದುವೆಯೆಂಬ ಆಮಿಷವೊಡ್ಡಿ ಯುವಕರನ್ನು ಬಲೆಗೆ ಬೀಳಿಸಿಕೊಳ್ಳುತ್ತಿದ್ದ ಕಿಲಾಡಿ ಲೇಡಿಯೊಬ್ಬಳ ಅಸಲಿ ಮುಖವಾಡ ಕಳಚಿದೆ. ಅರೋಹಿ, ರೇಣುಕಾ ಹಾಗೂ ಐಶ್ವರ್ಯ ಎಂಬ ಮೂರು ಹೆಸರುಗಳನ್ನು ಬಳಸಿಕೊಂಡು ಯುವಕರಿಗೆ ಲಕ್ಷಾಂತರ ರೂಪಾಯಿ ವಂಚಿಸುತ್ತಿದ್ದ ಈ ‘ಮಾಯಾಂಗಿ’ಯ ಜಾಲಕ್ಕೆ ಸಿಲುಕಿ ಯುವಕನೊಬ್ಬ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ಜಿಲ್ಲೆಯಲ್ಲಿ ಸಂಚಲನ ಮೂಡಿಸಿದೆ.
ನಡೆದಿದ್ದೇನು?
ಬಂಧಿತ ಯುವತಿಯನ್ನು ಐಶ್ವರ್ಯ ಎಂದು ಗುರುತಿಸಲಾಗಿದ್ದು, ಈಕೆ ತನ್ನ ಸೌಂದರ್ಯವನ್ನೇ ಬಂಡವಾಳ ಮಾಡಿಕೊಂಡು ಯುವಕರನ್ನು ಟಾರ್ಗೆಟ್ ಮಾಡುತ್ತಿದ್ದಳು. ಧಾರವಾಡದ ಗುರು ವಕ್ಕುಂದ್ ಎಂಬ ಯುವಕನಿಗೆ ಮದುವೆಯಾಗುವುದಾಗಿ ನಂಬಿಸಿದ್ದ ಈಕೆ, ಹಂತ ಹಂತವಾಗಿ ಸುಮಾರು 7 ಲಕ್ಷ ರೂಪಾಯಿ ಹಣವನ್ನು ಪೀಕಿದ್ದಳು. ಹಣ ಕೈ ಸೇರಿದ ಮೇಲೆ ಮದುವೆಯ ಪ್ರಸ್ತಾಪ ಬಂದಾಗ ವರಸೆ ಬದಲಿಸಿದ್ದಾಳೆ. ಇದರಿಂದ ಮನನೊಂದ ಗುರು, ಜಿಲ್ಲಾಸ್ಪತ್ರೆಯ ಆವರಣದಲ್ಲೇ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದಾನೆ.
ಆಸ್ಪತ್ರೆ ಆವರಣದಲ್ಲೇ ಹೈಡ್ರಾಮಾ!
ವಿಷ ಸೇವಿಸಿ ಚಿಕಿತ್ಸೆ ಪಡೆಯುತ್ತಿದ್ದ ಗುರುವಿನ ಆರೋಗ್ಯ ವಿಚಾರಿಸಲು ಐಶ್ವರ್ಯ ಜಿಲ್ಲಾಸ್ಪತ್ರೆಗೆ ಆಗಮಿಸಿದ್ದಳು. ಈ ವೇಳೆ ಆಕೆಯನ್ನು ಗುರುತಿಸಿದ ಗುರುವಿನ ಕುಟುಂಬಸ್ಥರು ಆಕ್ರೋಶಗೊಂಡು ಆಕೆಯನ್ನು ತರಾಟೆಗೆ ತೆಗೆದುಕೊಂಡರು. ವಿಷಯ ತಿಳಿಯುತ್ತಿದ್ದಂತೆ ಅಲ್ಲಿಂದ ಪರಾರಿಯಾಗಲು ಯತ್ನಿಸಿದ ಐಶ್ವರ್ಯಳನ್ನು ಬೆನ್ನಟ್ಟಿದ ಸಾರ್ವಜನಿಕರು ಮತ್ತು ಕುಟುಂಬಸ್ಥರು ಆಕೆಗೆ ‘ಧರ್ಮದೇಟು’ ನೀಡಿ ಪೊಲೀಸರ ವಶಕ್ಕೆ ಒಪ್ಪಿಸಿದ್ದಾರೆ.
ತನಿಖೆಯಲ್ಲಿ ಬಯಲಾದ ಶಾಕಿಂಗ್ ಸಂಗತಿಗಳು:
- ಹೆಸರು ಬದಲಾವಣೆ: ಈಕೆ ಒಬ್ಬನೇ ಯುವಕನಿಗೆ ಸೀಮಿತವಾಗಿರದೆ, ಐಶ್ವರ್ಯಾ, ರೇಣುಕಾ ಮತ್ತು ಆರೋಹಿ ಎಂಬ ಬೇರೆ ಬೇರೆ ಹೆಸರುಗಳಿಂದ ಯುವಕರನ್ನು ವಂಚಿಸುತ್ತಿದ್ದಳು.
- ಹಲವರಿಗೆ ವಂಚನೆ: ಕೇವಲ ಗುರು ಮಾತ್ರವಲ್ಲದೆ, ಸಂಜು ದೊಡ್ಡಮನಿ ಎಂಬ ಯುವಕನಿಗೂ ಈಕೆ ಲಕ್ಷಾಂತರ ರೂಪಾಯಿ ವಂಚಿಸಿರುವುದು ಪ್ರಾಥಮಿಕ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
- ಹಿನ್ನೆಲೆ: ಆರೋಪಿತೆ ಐಶ್ವರ್ಯಾಗೆ ಈಗಾಗಲೇ ಮದುವೆಯಾಗಿ ಒಂದು ಮಗುವಿದೆ. ಗಂಡನಿಂದ ವಿಚ್ಛೇದನ ಪಡೆದಿರುವ ಈಕೆ, ಸುಲಭವಾಗಿ ಹಣ ಗಳಿಸಲು ಈ ವಂಚನೆಯ ಹಾದಿ ಹಿಡಿದಿದ್ದಳು ಎಂದು ಗುರುವಿನ ತಾಯಿ ರತ್ನವ್ವ ಆರೋಪಿಸಿದ್ದಾರೆ.
“ನನ್ನ ಮಗನ ಹಣ ವಾಪಸ್ ಕೊಡಬೇಕು ಅಥವಾ ಆತನನ್ನು ಮದುವೆಯಾಗಬೇಕು” ಎಂದು ಗುರುವಿನ ತಾಯಿ ರತ್ನವ್ವ ಪೊಲೀಸರ ಮುಂದೆ ಕಣ್ಣೀರಿಟ್ಟಿದ್ದಾರೆ. ಸದ್ಯ ಸಂತ್ರಸ್ತ ಯುವಕ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಈಕೆಯ ಹಿಂದೆ ಬೇರೆ ಯಾರಾದರೂ ಇದ್ದಾರೆಯೇ ಎಂಬ ಬಗ್ಗೆ ತನಿಖೆ ಚುರುಕುಗೊಳಿಸಿದ್ದಾರೆ.
