ಬೆಂಗಳೂರು: ಕರ್ನಾಟಕ ಸರ್ಕಾರವು ಕಂದಾಯ ಇಲಾಖೆಯ ದಾಖಲೆಗಳ ಡಿಜಿಟಲೀಕರಣಕ್ಕೆ (Digitization) ನೀಡಿದ ಆದ್ಯತೆಯಿಂದಾಗಿ, ಇ-ಖಾತಾ (e-Khata) ಸೇರಿದಂತೆ ಬಹುತೇಕ ದಾಖಲೆಗಳು ಈಗಾಗಲೇ ಆನ್ಲೈನ್ನಲ್ಲಿ ಲಭ್ಯವಾಗುತ್ತಿವೆ. ಭೂ-ಸುರಕ್ಷಾ ಯೋಜನೆಯಡಿಯಲ್ಲಿ ಇದುವರೆಗೆ 65 ಲಕ್ಷ ಕಡತಗಳು ಮತ್ತು 8.2 ಲಕ್ಷ ರಿಜಿಸ್ಟರ್ಗಳು ಸೇರಿ ಸುಮಾರು ೪೫ ಕೋಟಿ ಪುಟಗಳ ಕಂದಾಯ ಇಲಾಖೆಯ ದಾಖಲೆಗಳನ್ನು ಆನ್ಲೈನ್ನಲ್ಲಿ ಅಪ್ಲೋಡ್ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಶೀಘ್ರದಲ್ಲೇ ಡಿಜಿಟಲ್ ರೆಕಾರ್ಡ್ ಕೊಠಡಿಗಳು ಉದ್ಘಾಟನೆ
ದಾಖಲೆಗಳನ್ನು ಸುರಕ್ಷಿತವಾಗಿಡಲು ಮತ್ತು ನಾಗರಿಕರಿಗೆ ಸುಲಭವಾಗಿ ಪ್ರವೇಶ ಕಲ್ಪಿಸಲು, ಶೀಘ್ರದಲ್ಲೇ ಹೊಸ ಡಿಜಿಟಲ್ ರೆಕಾರ್ಡ್ ಕೊಠಡಿಗಳನ್ನು ಸಿದ್ಧಪಡಿಸಲಾಗುತ್ತಿದೆ. ಈ ಕೊಠಡಿಗಳು ಬಯೋಮೆಟ್ರಿಕ್ ಪ್ರವೇಶ, ಸ್ಕ್ಯಾನರ್ಗಳು ಮತ್ತು ಕಣ್ಗಾವಲು ಕ್ಯಾಮೆರಾಗಳನ್ನು ಹೊಂದಿದ್ದು, ನಾಗರಿಕರು ‘ಸೇವಾ ಸಿಂಧು’ ಮೂಲಕ ಆನ್ಲೈನ್ನಲ್ಲಿ ದಾಖಲೆಗಳನ್ನು ಪ್ರವೇಶಿಸಲು ಅನುವು ಮಾಡಿಕೊಡುತ್ತವೆ ಎನ್ನಲಾಗಿದೆ.
ಈ ಡಿಜಿಟಲ್ ರೆಕಾರ್ಡ್ ಕೊಠಡಿಗಳು ಡಿಜಿಟಲ್ ಗ್ರಂಥಾಲಯಗಳಂತೆ ಕಾರ್ಯನಿರ್ವಹಿಸಲು ವಿನ್ಯಾಸಗೊಳಿಸಲಾಗಿದ್ದು, ಕಾಗದದ ಕಡತಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಸಹಕಾರಿಯಾಗಲಿದೆ. ಈ ಮೂಲಕ ಪ್ರತಿಯೊಂದು ದಾಖಲೆಯು ಸೂಚ್ಯಂಕ, ಪಟ್ಟಿ, ಸ್ಕ್ಯಾನ್ ಮತ್ತು ಹುಡುಕಬಹುದಾದ ಡೇಟಾಬೇಸ್ಗೆ ಅಪ್ಲೋಡ್ ಆಗಿದೆ.
ದಾಖಲೆ ಸ್ಥಳಾಂತರಕ್ಕೆ ಬ್ರೇಕ್: 50 ವರ್ಷ ಹಳೆಯ ಫೈಲ್ ಸುಲಭ ಲಭ್ಯ
ಈ ಡಿಜಿಟಲೀಕರಣ ಪ್ರಕ್ರಿಯೆಯು ಕೇವಲ ಫೈಲ್ಗಳನ್ನು ನಕಲು ಮಾಡುವ ಕ್ರಮವಲ್ಲ. ಪ್ರತಿಯೊಂದು ದಾಖಲೆಯು ಕೀವರ್ಡ್ಗಳನ್ನು ಹೊಂದಿದ್ದು, ಇಂದಿನ ದಾಖಲೆಯಷ್ಟೇ ಸುಲಭವಾಗಿ ೫೦ ವರ್ಷ ಹಳೆಯ ಫೈಲ್ ಅನ್ನು ಸಹ ಹುಡುಕಿ ಹಿಂಪಡೆಯಲು ಸಾಧ್ಯವಾಗುತ್ತದೆ ಎಂದು ಕಂದಾಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ರಾಜೇಂದ್ರ ಕಟಾರಿಯಾ ಅವರು ಹೇಳಿದ್ದಾರೆ.
ಈ ಯೋಜನೆಯು ದುರುಪಯೋಗ ಮತ್ತು ಭೂ ದಾಖಲೆಗಳ ಸ್ಥಳಾಂತರವನ್ನು ಕೊನೆಗೊಳಿಸಲು ದೊಡ್ಡ ಪಾತ್ರ ನಿರ್ವಹಿಸಲಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಇದರಿಂದಾಗಿ ಭೂ ದಾಖಲೆಗಳ ನಿರ್ವಹಣೆಯಲ್ಲಿ ಪಾರದರ್ಶಕತೆ ಮತ್ತು ದಕ್ಷತೆ ಹೆಚ್ಚಳವಾಗಲಿದೆ.
