ರಾಮನಗರ: ಸ್ವಾರ್ಥ ತುಂಬಿದ ಈ ಆಧುನಿಕ ಜಗತ್ತಿನಲ್ಲಿ ಮನುಷ್ಯ ಸಂಬಂಧಗಳೇ ನಶಿಸುತ್ತಿರುವ ಕಾಲವಿದು. ಆದರೆ, ತನಗೆ ಅನ್ನ ನೀಡಿದ ಕೈಗಳನ್ನು ಮರೆಯದ ಮೂಕಪ್ರಾಣಿಯೊಂದು ವೃದ್ಧೆಯ ಸಾವಿಗೆ ಮರುಗಿ ಕಣ್ಣೀರಿಟ್ಟ ಹೃದಯಸ್ಪರ್ಶಿ ಘಟನೆ ರಾಮನಗರ ಜಿಲ್ಲೆಯ ಚನ್ನಪಟ್ಟಣ ತಾಲೂಕಿನ ರಾಯರದೊಡ್ಡಿಯಲ್ಲಿ ನಡೆದಿದೆ. ಬಿ.ವಿ. ಹಳ್ಳಿ ನಿವಾಸಿ ಪಾರ್ವತಮ್ಮ (85) ಎಂಬುವವರು ಇಹಲೋಕ ತ್ಯಜಿಸಿದಾಗ, ಅವರ ಪಾರ್ಥಿವ ಶರೀರವನ್ನು ತಬ್ಬಿಕೊಂಡು ಮುತ್ತಿಕ್ಕುತ್ತಾ ಮಂಗವೊಂದು ಪಟ್ಟ ಪಾಡು ನೆರೆದಿದ್ದವರ ಕಣ್ಣಾಲಿಗಳನ್ನು ಒದ್ದೆಯಾಗಿಸಿದೆ.
ಮೃತ ಪಾರ್ವತಮ್ಮ ಅವರು ಕಳೆದ ದಶಕಗಳಿಂದ ತಮ್ಮ ಮನೆ ಹತ್ತಿರ ಬರುತ್ತಿದ್ದ ಮಂಗಗಳಿಗೆ ನಿರಂತರವಾಗಿ ಆಹಾರ ನೀಡಿ ಸಾಕಿ ಸಲಹುತ್ತಿದ್ದರು. ಈ ಪ್ರೀತಿಯ ಬಾಂಧವ್ಯ ಕೇವಲ ಹಸಿವು ನೀಗಿಸುವ ಸಂಬಂಧವಾಗಿರದೆ, ಒಂದು ಅವಿನಾಭಾವ ಸ್ನೇಹವಾಗಿ ಬೆಳೆದಿತ್ತು. ಕಳೆದ ಸೋಮವಾರ ರಾತ್ರಿ ಅನಾರೋಗ್ಯದಿಂದ ಪಾರ್ವತಮ್ಮ ಕೊನೆಯುಸಿರೆಳೆದಾಗ, ಅವರ ಪಾರ್ಥಿವ ಶರೀರವನ್ನು ಮನೆಗೆ ತರುತ್ತಿದ್ದಂತೆ ಅಲ್ಲಿಗೆ ಆಗಮಿಸಿದ ಮಂಗ, ತನ್ನನ್ನು ಸಲಹಿದ ‘ಅಮ್ಮ’ ಇನ್ನಿಲ್ಲವೆಂಬ ಸತ್ಯ ಅರಿತಂತೆ ಮೃತದೇಹದ ಮೇಲೆ ಬಿದ್ದು ಬಿಕ್ಕಿ ಬಿಕ್ಕಿ ಅತ್ತಿದೆ. ವೃದ್ಧೆಯ ಮುಖವನ್ನು ತಬ್ಬಿ ಮುತ್ತಿಕ್ಕುತ್ತಾ, ಅಗಲಿದ ಜೀವಕ್ಕಾಗಿ ಕಂಬನಿ ಮಿಡಿಯುವ ಮೂಲಕ ಪ್ರಾಣಿಗಳಲ್ಲಿರುವ ಅಪಾರ ಪ್ರೀತಿಯನ್ನು ಜಗತ್ತಿಗೆ ಸಾರಿದೆ. ರಕ್ತಸಂಬಂಧಿಗಳನ್ನೂ ಮೀರಿಸುವಂತಿದ್ದ ಈ ಮೂಕಪ್ರಾಣಿಯ ಆಕ್ರಂದನ ಮತ್ತು ನಿಷ್ಕಲ್ಮಶ ಪ್ರೇಮದ ದೃಶ್ಯವು ಇಡೀ ಗ್ರಾಮದ ಜನರನ್ನು ಬೆರಗುಗೊಳಿಸಿದ್ದಲ್ಲದೆ, ಮನುಷ್ಯ ಪ್ರೀತಿಗಿಂತ ಪ್ರಾಣಿಗಳ ಕೃತಜ್ಞತಾ ಭಾವ ದೊಡ್ಡದು ಎಂಬುದನ್ನು ಸಾಬೀತುಪಡಿಸಿದೆ.
