ಇಂಜಿನಿಯರ್ಗೆ ₹1.40 ಕೋಟಿ, ಖಾಸಗಿ ಉದ್ಯೋಗಿಗೆ ₹88 ಲಕ್ಷ ಪಂಗನಾಮ; ಸೈಬರ್ ಕ್ರೈಂ ಪೊಲೀಸರಿಗೆ ದೂರು
ಬೆಂಗಳೂರು, ಅಕ್ಟೋಬರ್ 3: ಇತ್ತೀಚೆಗೆ ಸೈಬರ್ ಕ್ರೈಮ್ ಪ್ರಕರಣಗಳು ಹೆಚ್ಚಾಗುತ್ತಿರುವ ನಡುವೆಯೇ, ಬೆಂಗಳೂರಿನಲ್ಲಿ ಆನ್ಲೈನ್ ಟ್ರೇಡಿಂಗ್ ಹೂಡಿಕೆಯ ಹೆಸರಿನಲ್ಲಿ ಇಬ್ಬರು ವ್ಯಕ್ತಿಗಳು ಬರೋಬ್ಬರಿ ₹2.28 ಕೋಟಿ ಕಳೆದುಕೊಂಡಿರುವ ಜಂಟಿ ಸೈಬರ್ ವಂಚನೆ ಪ್ರಕರಣಗಳು ಬೆಳಕಿಗೆ ಬಂದಿವೆ.
ಈ ಸೈಬರ್ ಅಪರಾಧಕ್ಕೆ ಒಳಗಾದವರಲ್ಲಿ ಓರ್ವ ಇಂಜಿನಿಯರ್ ಮತ್ತು ಇನ್ನೋರ್ವ ಖಾಸಗಿ ಸಂಸ್ಥೆಯ ಉದ್ಯೋಗಿ ಸೇರಿದ್ದಾರೆ. ಕಳೆದ ಎರಡು ವಾರಗಳಲ್ಲಿ ಈಸ್ಟ್ ಸೈಬರ್ ಕ್ರೈಮ್ ಠಾಣೆಯಲ್ಲಿ ಈ ಎರಡೂ ಪ್ರಕರಣಗಳನ್ನು ದಾಖಲಿಸಲಾಗಿದೆ.
ಇಂಜಿನಿಯರ್ಗೆ ₹1.40 ಕೋಟಿ ವಂಚನೆ
ಬೆಂಗಳೂರಿನ ರಾಮಮೂರ್ತಿ ನಗರ ನಿವಾಸಿ ರಾಮನಾಥ್ ಎಸ್ (ಹೆಸರು ಬದಲಾಯಿಸಲಾಗಿದೆ) ಎಂಬ 45 ವರ್ಷದ ಇಂಜಿನಿಯರ್ ಈ ಪ್ರಕರಣದಲ್ಲಿ ₹1.40 ಕೋಟಿಗೂ ಅಧಿಕ ಹಣವನ್ನು ಕಳೆದುಕೊಂಡಿದ್ದಾರೆ.
ಘಟನೆ ವಿವರ: 2024ರ ಡಿಸೆಂಬರ್ನಲ್ಲಿ ಇವರಿಗೆ ವಾಟ್ಸಾಪ್ ಮೂಲಕ ‘ರಾಣಿ ಸಾಹ’ ಎಂಬ ಮಹಿಳೆಯ ಪರಿಚಯವಾಯಿತು. ಆಕೆ ತಾನು ಆನ್ಲೈನ್ ಹೂಡಿಕೆಗಳಿಂದ ಕೋಟ್ಯಾಧಿಪತಿಯಾಗಿರುವುದಾಗಿ ಸಂದೇಶದ ಮೂಲಕ ತಿಳಿಸಿದ್ದಳು. ಆನಂತರ ರಾಮನಾಥರನ್ನು ಒಂದು ವಾಟ್ಸಾಪ್ ಗುಂಪಿನಲ್ಲಿ ಸೇರಿಸಲಾಯಿತು. ಅಲ್ಲಿ ‘ರವಿ ಕುಮಾರ್’ ಎಂಬಾತನ ಪರಿಚಯವಾಗಿದೆ. ಕೆಲಸದ ಮೇಲೆ ಯು.ಕೆ.ಗೆ ಹೋದಾಗ ಕುಮಾರ್ ಇವರ ಮನವೊಲಿಸಿ ₹10,000 ಹೂಡಿಕೆ ಮಾಡಿಸಿದ್ದ. ಇದರಿಂದ ಸಣ್ಣ ಲಾಭಗಳು ಬಂದ ನಂತರ ರಾಮನಾಥ್ ಈ ಯೋಜನೆಯನ್ನು ಸಂಪೂರ್ಣವಾಗಿ ನಂಬಿದ್ದಾರೆ.
ನಂತರ ಇವರಿಗೆ ಕ್ಯಾಂಬ್ರಿಡ್ಜ್ ಯೂನಿವರ್ಸಿಟಿಯ ‘ದಿವಾಕರ್’ ಎಂಬಾತನನ್ನು ಪರಿಚಯಿಸಲಾಯಿತು. ಹೀಗೆ ರಾಮನಾಥ್ ಹತ್ತು ತಿಂಗಳುಗಳ ಕಾಲ ಹಂತ ಹಂತವಾಗಿ ಅವರ ಖಾತೆಗೆ ₹1,40,14,197 ಹಣವನ್ನು ವರ್ಗಾಯಿಸಿದ್ದಾರೆ. ಆದರೆ, ಹೂಡಿಕೆಯ ಲಾಭವನ್ನು ಹಿಂಪಡೆಯಲು ಹೋದಾಗಲೆಲ್ಲ ಸರ್ವಿಸ್ ಚಾರ್ಜ್ ಹೆಸರಿನಲ್ಲಿ ಶೇ. 5ರಷ್ಟು ಹಣವನ್ನು ಪಾವತಿಸಲು ಅಪರಾಧಿಗಳು ಸೂಚಿಸುತ್ತಿದ್ದರು. ಇದರಿಂದ ಶಂಕೆಗೊಳಗಾದ ರಾಮನಾಥ್ ಸ್ನೇಹಿತರೊಂದಿಗೆ ಮಾತನಾಡಿ, ತಾನು ದೊಡ್ಡ ವಂಚನೆಗೊಳಗಾಗಿರುವುದನ್ನು ಅರಿತಿದ್ದಾರೆ.
ಖಾಸಗಿ ಉದ್ಯೋಗಿಯಿಂದ ₹88.36 ಲಕ್ಷ ನಷ್ಟ
ಇನ್ನೋರ್ವ ಬಲಿಪಶುವಾದ, ಬೆಂಗಳೂರಿನ ಬಾಣಸವಾಡಿಯ ಖಾಸಗಿ ಸಂಸ್ಥೆಯ ಉದ್ಯೋಗಿ ಸನತ್ ಪಿ (ಹೆಸರು ಬದಲಾಯಿಸಲಾಗಿದೆ) ಅವರು 2025ರ ಜೂನ್ನಿಂದ ಸೆಪ್ಟೆಂಬರ್ ತಿಂಗಳ ಅಂತರದಲ್ಲಿ ₹88.36 ಲಕ್ಷ ಕಳೆದುಕೊಂಡಿದ್ದಾರೆ. ತಾನು ಸೆಬಿ (SEBI) ನೋಂದಾಯಿತ ಕಂಪನಿಯಾದ ‘ಓಡೊಮ್ಯಾಕ್ಸ್/ಒಪೆನ್ಹೈಮರ್’ ಎಂಬಲ್ಲಿ ಹೂಡಿಕೆ ಮಾಡುತ್ತಿರುವುದಾಗಿ ಭಾವಿಸಿ ಮೋಸ ಹೋಗಿದ್ದಾರೆ.
ಸೈಬರ್ ಅಪರಾಧಿಗಳು ಇವರಿಗೆ ಒಂದು ನಕಲಿ ಟ್ರೇಡಿಂಗ್ ಆ್ಯಪ್ ಹಂಚಿಕೊಂಡಿದ್ದರು. ಅದನ್ನು ಡೌನ್ಲೋಡ್ ಮಾಡಿಕೊಂಡ ಸನತ್, ನಿರಂತರವಾಗಿ ಹಣ ಹೂಡಿಕೆ ಮಾಡಿದ್ದಾರೆ. ಅವರ ಹೂಡಿಕೆಯು ಬೆಳೆಯುತ್ತಿದೆ ಎಂದು ನಂಬಿಸಲು ಆ ನಕಲಿ ಆ್ಯಪ್ನಲ್ಲಿ ಲಾಭಾಂಶದ ಗ್ರಾಫ್ಗಳನ್ನು ಸಹ ತೋರಿಸಲಾಗಿತ್ತು. ಸನತ್ ಅವರು ತಮ್ಮ ಸಂಬಂಧಿಯಿಂದ ಪಡೆದ ₹8.40 ಲಕ್ಷ ಹಣವನ್ನೂ ಹೂಡಿಕೆ ಮಾಡಿ, ಕೇವಲ ₹50,000 ಮಾತ್ರ ಹಿಂಪಡೆಯಲು ಸಾಧ್ಯವಾಯಿತು. ಹಲವಾರು ಬಾರಿ ಹಣ ಹಿಂಪಡೆಯಲು ವಿಫಲರಾದಾಗ ಇದು ಸೈಬರ್ ವಂಚನೆಯೆಂದು ತಿಳಿದು ಬಂದಿದೆ.
ವಂಚನೆಗೊಳಗಾದ ರಾಮನಾಥ್ ಮತ್ತು ಸನತ್ ಇಬ್ಬರೂ ಸೈಬರ್ ಪೊಲೀಸರ ಮೊರೆ ಹೋಗಿದ್ದಾರೆ. ಪೊಲೀಸರು ಇಬ್ಬರ ಬ್ಯಾಂಕ್ ಖಾತೆಗಳ ಮೇಲೆ ಕಣ್ಣಿಟ್ಟಿದ್ದು, ತನಿಖೆ ಆರಂಭಿಸಿದ್ದಾರೆ.
