ಬಾಗಲಕೋಟಿ:ಮಹಾಲಿಂಗಪುರದ ಮಹಾಜಾತ್ರೆ – ಲಕ್ಷಾಂತರ ಭಕ್ತರ ಹರ್ಷೋದ್ಘಾರದ ನಡುವೆ ಅದ್ದೂರಿ ರಥೋತ್ಸವ

ಮಹಾಲಿಂಗಪುರದ ಮಹಾಜಾತ್ರೆ – ಲಕ್ಷಾಂತರ ಭಕ್ತರ ಹರ್ಷೋದ್ಘಾರದ ನಡುವೆ ಅದ್ದೂರಿ ರಥೋತ್ಸವ

ಮಹಾಲಿಂಗಪುರ:ಪಟ್ಟಣದ ಆರಾಧ್ಯ ದೈವ ಶ್ರೀ ಮಹಾಲಿಂಗೇಶ್ವರರ ವಾರ್ಷಿಕ ಮಹಾಜಾತ್ರೆಯ ರಥೋತ್ಸವ ಶನಿವಾರ ಸಂಜೆ ಅದ್ದೂರಿಯಾಗಿ ಜರುಗಿತು. ಸಾಂಪ್ರದಾಯಿಕ ಶೈಲಿಯಲ್ಲಿ ಹೂವಿನ ಅಲಂಕಾರ, ವಿದ್ಯುತ್ ದೀಪಾಲಂಕಾರದಿಂದ ಕಂಗೊಳಿಸಿದ ರಥಕ್ಕೆ ಶ್ರೀಮಠದ ಪೀಠಾಧಿಪತಿ ಶಿವಯೋಗಿ ರಾಜೇಂದ್ರ ಮಹಾಸ್ವಾಮಿಜಿಯವರ ಪೂಜೆಯೊಂದಿಗೆ ಸಂಜೆ 7.45ಕ್ಕೆ ಚಾಲನೆ ದೊರೆಯಿತು.

ಹರಿವಾನ ಕಟ್ಟೆ ಲೂಟಿ – ಭಕ್ತರ ಹರ್ಷೋದ್ಘಾರ

ರಥೋತ್ಸವಕ್ಕೂ ಮುನ್ನ ಸಂಪ್ರದಾಯಬದ್ಧ ಹರಿವಾನ ಕಟ್ಟೆ ಲೂಟಿ ಭಕ್ತರಲ್ಲಿನ ಸಂಭ್ರಮವನ್ನು ಮತ್ತಷ್ಟು ಹೆಚ್ಚಿಸಿತು. ಪಾದಗಟ್ಟೆಯ ಎದುರು ನಿರ್ಮಿಸಲಾದ ಹರಿವಾನ ಕಟ್ಟೆಯಲ್ಲಿ ರೈತರು ತಂದಿದ್ದ ಕಬ್ಬು, ಜೋಳದ ದಂಟು, ಬಾಳೆಗಿಡಗಳನ್ನು ಸ್ವಾಮೀಜಿ ಪೂಜೆ ಸಲ್ಲಿಸಿದ ನಂತರ ಸಾವಿರಾರು ಭಕ್ತರು ಪರಸ್ಪರ ಹರ್ಷೋದ್ಗಾರದಿಂದ ದೋಚಿಕೊಂಡು ಹೋದರು. ಈ ಬೆಳೆಗಳನ್ನು ಮನೆ-ಅಂಗಡಿಗಳಲ್ಲಿ ಕಟ್ಟಿಡುವುದರಿಂದ ಅನ್ನಭಾರಾಟವಿಲ್ಲವೆಂಬ ನಂಬಿಕೆ ಇದೆ.

ರಥೋತ್ಸವದ ಮೆರಗು ಹೆಚ್ಚಿಸಿದ ಮಂಗಳವಾದ್ಯಗಳು

ಶನಿವಾರ ಸಂಜೆ ಆರಂಭವಾದ ತುಂಬಿದ ತೇರು ಉಚ್ಚಾಯಿ, ನಂದಿಕೋಲು, ಕರಡಿ ಮಜಲು, ಬಾಸಿಂಗ, ಶಹನಾಯಿ, ಹಲಗೆ-ಡೊಳ್ಳಿನ ನಾದದ ನಡುವೆ ಪಟ್ಟಣದ ಮುಖ್ಯ ಬೀದಿಗಳಲ್ಲಿ ಸಂಚರಿಸಿತು. ರಥಸಾಗರವು ರಾತ್ರಿಯಿಡೀ ಮುಂದುವರಿದು, ಭಾನುವಾರ ಮುಂಜಾನೆ ಚನ್ನಗಿರೇಶ್ವರ ದೇವಾಲಯ ತಲುಪಿತು.

ಲಕ್ಷಾಂತರ ಭಕ್ತರ ದರ್ಶನ

ಉಚಿತ ಬಸ್ ಪ್ರಯಾಣ ಸೌಲಭ್ಯದಿಂದ ರಾಜ್ಯದ ವಿವಿಧ ಭಾಗಗಳಿಂದ ಹಾಗೂ ಹೊರರಾಜ್ಯಗಳಿಂದಲೂ ಲಕ್ಷಾಂತರ ಭಕ್ತರು ಆಗಮಿಸಿದ್ದರು. ಮಹಾಲಿಂಗೇಶ್ವರ ದರ್ಶನ ಹಾಗೂ ರಥೋತ್ಸವ ದರ್ಶನಕ್ಕಾಗಿ ಬೆಂಡು, ಬೆತ್ತಾಸು, ಉತ್ತತ್ತಿ ಹಾರಿಸಿ ಭಕ್ತರು ಭಕ್ತಿಭಾವದಿಂದ ಪೂಜೆ ಸಲ್ಲಿಸಿದರು. ಮಹಿಳೆಯರು ಮತ್ತು ಮಕ್ಕಳೂ ಹೆಚ್ಚಾಗಿ ಭಾಗವಹಿಸಿದ್ದರು.

ಬಯಲಾಟ-ನಾಟಕಗಳಿಂದ ಜನಮನರಂಜನೆ

ಪಟ್ಟಣದ ಜವಳಿಬಜಾರ, ಮಹಾಲಿಂಗೇಶ್ವರ-ಚನ್ನಗಿರೇಶ್ವರ ದೇವಾಲಯಗಳು, ಅನ್ನಪೂರ್ಣೇಶ್ವರಿ ದೇವಸ್ಥಾನ ಸೇರಿದಂತೆ ಹಲವೆಡೆ ಬಯಲಾಟ, ಪಾರಿಜಾತ, ಭಜನೆ ಕಾರ್ಯಕ್ರಮಗಳು ನಡೆಯುತ್ತ ಜನರ ಸಂಭ್ರಮಕ್ಕೆ ಸಾಕ್ಷಿಯಾದವು.

ದೀಡ ನಮಸ್ಕಾರ – ಭಾವೈಕ್ಯತೆಯ ಸಂಕೇತ

ಮಹಾಜಾತ್ರೆಯ ಅಂಗವಾಗಿ ಸಾವಿರಾರು ಭಕ್ತರು ಪವಿತ್ರ ಬಸವತೀರ್ಥದಿಂದ ಶ್ರೀಮಠದವರೆಗೆ ಒದ್ದೆ ಬಟ್ಟೆಯಲ್ಲಿ ದೀಡ ನಮಸ್ಕಾರ ಹಾಕಿ ಹರಕೆ ಸಲ್ಲಿಸಿದರು. ಹಿಂದು-ಮುಸ್ಲಿಂ ಭಕ್ತರೂ ಸಮಾನ ಭಕ್ತಿಯಿಂದ ಭಾಗವಹಿಸಿದ್ದು, ಭಾವೈಕ್ಯತೆಯ ಸುವಾಸನೆ ಹರಡಿತು.

ಸೂಕ್ತ ಬಂದೋಬಸ್ತ್ – ಶಿಸ್ತಿನ ಜಾತ್ರೆ

ಲಕ್ಷಾಂತರ ಜನಸ್ತೋಮವನ್ನು ನಿಯಂತ್ರಿಸಲು ಜಮಖಂಡಿ ಡಿವೈಎಸ್‌ಪಿ ಜಮೀರ ರೋಷನ್, ಬನಹಟ್ಟಿ ಸಿಪಿಐ ಸಂಜೀವ ಬಳೆಗಾರರ ಮಾರ್ಗದರ್ಶನದಲ್ಲಿ ವ್ಯಾಪಕ ಬಂದೋಬಸ್ತ್ ಏರ್ಪಡಿಸಲಾಗಿತ್ತು. ವಾಹನ ಸಂಚಾರ ನಿಷೇಧ, ಪಾರ್ಕಿಂಗ್ ವ್ಯವಸ್ಥೆ ಸೇರಿದಂತೆ ಸೂಕ್ತ ಕ್ರಮ ಕೈಗೊಳ್ಳಲಾಯಿತು.

ಗಣ್ಯರ ಆಗಮನ

ಶನಿವಾರ ದಿನವಿಡೀ ರಾಜಕಾರಣಿಗಳು, ಗಣ್ಯರು, ಪೂಜ್ಯರು ಸೇರಿದಂತೆ ಸಾವಿರಾರು ಭಕ್ತರು ದೇವಸ್ಥಾನಕ್ಕೆ ಆಗಮಿಸಿ ಮಹಾಲಿಂಗೇಶ್ವರ ದರ್ಶನ ಹಾಗೂ ರಥೋತ್ಸವದ ವೈಭವವನ್ನು ಕಣ್ತುಂಬಿಕೊಂಡರು.

👉 ಮಹಾಲಿಂಗೇಶ್ವರರ ರಥೋತ್ಸವವು ಭಕ್ತಿ, ಸಂಭ್ರಮ, ಭಾವೈಕ್ಯತೆಯ ಚೇತನವನ್ನು ಹರಡಿದ ಜಾತ್ರೆಯಾಗಿ ಎಲ್ಲರ ಮನಸ್ಸಿನಲ್ಲಿ ಅಚ್ಚಳಿಯದ ನೆನಪಾಗಿತು.