*ಗುರುವಿನ ಗೌರವ: ಗುರುವಿನ ಗುಲಾಮನಾಗುವ ತನಕ ದೊರೆಯದಣ್ಣ ಮುಕುತಿ*

ಧಾರವಾಡ : ಸೆಪ್ಟೆಂಬರ್ 5 – ಶಿಕ್ಷಕರ ದಿನಾಚರಣೆ ವಿಶೇಷ ವರದಿ
ಭಾರತದ ಮಹಾನ್ ತತ್ವಜ್ಞಾನಿ ಮತ್ತು ಮಾಜಿ ರಾಷ್ಟ್ರಪತಿ ಡಾ. ಸರ್ವಪಲ್ಲಿ ರಾಧಾಕೃಷ್ಣನ್ ಅವರ ಜನ್ಮದಿನವನ್ನು ಸ್ಮರಿಸುವ ಈ ಪವಿತ್ರ ದಿನ, ಶಿಕ್ಷಣ ಕ್ಷೇತ್ರದಲ್ಲಿ ಆಗಿರುವ ಮಹತ್ತರ ಬದಲಾವಣೆಗಳು ಮತ್ತು ಅದರಿಂದ ಶಿಕ್ಷಕ ಸಮುದಾಯದ ಮೇಲಾದ ಪರಿಣಾಮಗಳನ್ನು ಅವಲೋಕಿಸಲು ಒಂದು ಸುಸಂದರ್ಭ.

ಹಿಂದಿನ ಪದ್ಧತಿಗಳಲ್ಲಿ ಗುರುವಿನ ಸ್ಥಾನ

ಹಿಂದಿನ ಕಾಲದ ಶಿಕ್ಷಣ ಪದ್ಧತಿ ಮತ್ತು ಸಾಮಾಜಿಕ ರಚನೆಯಲ್ಲಿ ಶಿಕ್ಷಕರು ಒಂದು ಪವಿತ್ರ ಸ್ಥಾನವನ್ನು ಹೊಂದಿದ್ದರು. ‘ಗುರುಕುಲ’ ಪದ್ಧತಿಯಲ್ಲಿ ಗುರುವನ್ನು ಬ್ರಹ್ಮ, ವಿಷ್ಣು ಮತ್ತು ಮಹೇಶ್ವರನ ಸ್ಥಾನದಲ್ಲಿಟ್ಟು ಪೂಜಿಸಲಾಗುತ್ತಿತ್ತು. ವಿದ್ಯಾರ್ಥಿಗಳು ಮಾತ್ರವಲ್ಲದೆ, ಇಡೀ ಸಮಾಜವೇ ಶಿಕ್ಷಕರನ್ನು ಗೌರವದಿಂದ ಕಾಣುತ್ತಿತ್ತು ಮತ್ತು ಅವರ ಮಾತುಗಳಿಗೆ ಅಪಾರ ಬೆಲೆ ಇತ್ತು.

ಶಿಕ್ಷಕರು ಕೇವಲ ಅಕ್ಷರಗಳನ್ನು ಕಲಿಸದೆ, ವಿದ್ಯಾರ್ಥಿಗಳಲ್ಲಿ ಶಿಸ್ತು, ಸಂಸ್ಕಾರ, ನೈತಿಕ ಮೌಲ್ಯಗಳು, ದೇಶಭಕ್ತಿ ಮತ್ತು ಮಾನವೀಯ ಗುಣಗಳನ್ನು ತುಂಬುವ ಮಾರ್ಗದರ್ಶಕರಾಗಿದ್ದರು. ಶಿಕ್ಷಕ ಮತ್ತು ವಿದ್ಯಾರ್ಥಿಯ ಸಂಬಂಧ ತಂದೆ-ಮಗನಂತೆ ಭಾವನಾತ್ಮಕವಾಗಿತ್ತು. ಇತರ ಯಾವುದೇ ಆಮಿಷಗಳಿಗೆ ಒಳಗಾಗಿ ಗೌರವಕ್ಕೆ ಧಕ್ಕೆ ಆಗುತ್ತಿರಲಿಲ್ಲ. ಶಿಕ್ಷಕರು ಸಮಾಜದ ಸತ್ಯ, ನೀತಿ ಮತ್ತು ನ್ಯಾಯದ ಸಂಕೇತವಾಗಿದ್ದರು.

ಆಧುನಿಕತೆಯ ಪ್ರಭಾವ ಮತ್ತು ಬದಲಾದ ಸಂಬಂಧಗಳು

ಆಧುನಿಕ ಯುಗದಲ್ಲಿ ಶಿಕ್ಷಣವು ಕೇವಲ ಜ್ಞಾನಾರ್ಜನೆಯ ಸಾಧನವಾಗಿರದೆ, ಒಂದು ವಾಣಿಜ್ಯ ಉದ್ಯಮವಾಗಿ ಮಾರ್ಪಟ್ಟಿದೆ. ಈ ಬದಲಾವಣೆಯು ಶಿಕ್ಷಕ–ವಿದ್ಯಾರ್ಥಿ ಸಂಬಂಧದಲ್ಲಿ ಬಿರುಕು ಮೂಡಿಸಿದೆ. ಶಿಕ್ಷಕರ ಮೇಲಿನ ಗೌರವ ಕಡಿಮೆಯಾಗುತ್ತಿರುವುದನ್ನು ನಾವು ಕಾಣುತ್ತಿದ್ದೇವೆ.

ಕೆಲವೊಂದು ದುರ್ಘಟನೆಗಳಿಂದಾಗಿ ಇಡೀ ಶಿಕ್ಷಕ ಸಮುದಾಯದ ಮೇಲೆ ನಕಾರಾತ್ಮಕ ಭಾವನೆ ಮೂಡಿದ್ದು, ಇದು ವಿಷಾದನೀಯ. ಆದರೂ, ಯಾವುದೆ ಆಮಿಷಕ್ಕೆ ಒಳಗಾಗದೆ, ತಮ್ಮ ಕರ್ತವ್ಯವನ್ನು ನಿಷ್ಠೆಯಿಂದ ನಿರ್ವಹಿಸುವ ಅದೆಷ್ಟೋ ಶಿಕ್ಷಕರು ಇಂದಿಗೂ ಇದ್ದಾರೆ.

ಶಿಕ್ಷಕರ ಅಭಿಪ್ರಾಯ

ಇದೇ ವಿಷಯದ ಕುರಿತು ಹೆಸರು ಹೇಳಲು ಇಚ್ಚಿಸದ ಶಿಕ್ಷಕರೊಬ್ಬರು ತಮ್ಮ ಅಭಿಪ್ರಾಯ ಹಂಚಿಕೊಂಡು,
“ಶಿಕ್ಷಕರು ಇಂದಿಗೂ ಸಮಾಜವನ್ನು ರೂಪಿಸುವ ಪ್ರಮುಖ ಶಕ್ತಿ. ಆದರೆ, ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಶಿಕ್ಷಣ ವ್ಯವಸ್ಥೆಯಲ್ಲಿ ಉಂಟಾಗಿರುವ ಬದಲಾವಣೆಗಳು ಶಿಕ್ಷಕರ ಗೌರವಕ್ಕೆ ಧಕ್ಕೆ ತಂದಿವೆ. ಇಂದು ಶಿಕ್ಷಕರ ಜ್ಞಾನ ಮತ್ತು ಶ್ರಮವನ್ನು ಕೇವಲ ಅಂಕಗಳ ಆಧಾರದ ಮೇಲೆ ಅಳೆಯಲಾಗುತ್ತದೆ. ಆದರೆ, ಶಿಕ್ಷಕರು ವಿದ್ಯಾರ್ಥಿಯ ಭವಿಷ್ಯವನ್ನು ರೂಪಿಸುವ ವಾಸ್ತುಶಿಲ್ಪಿಗಳು ಎಂಬುದನ್ನು ಸಮಾಜ ಮರೆಯಬಾರದು,” ಎಂದು ನುಡಿದರು.

ಗುರುವಿಗೆ ಗೌರವ ಸಲ್ಲಿಸುವುದು ನಮ್ಮೆಲ್ಲರ ಕರ್ತವ್ಯ

ಶಿಕ್ಷಕರನ್ನು ಕೇವಲ ಸಂಬಳ ಪಡೆಯುವ ನೌಕರರು ಎಂದು ನೋಡುವ ಬದಲು, ಸಮಾಜದ ಭವಿಷ್ಯವನ್ನು ನಿರ್ಮಿಸುವ ಶಿಲ್ಪಿಗಳು ಎಂದು ಪರಿಗಣಿಸುವುದು ತುರ್ತು ಅಗತ್ಯ.

ಶಿಕ್ಷಕರು ಮತ್ತು ವಿದ್ಯಾರ್ಥಿಗಳ ನಡುವೆ ಪರಸ್ಪರ ವಿಶ್ವಾಸ ಮತ್ತು ಗೌರವದ ಸೇತುವೆ ಮರುಸ್ಥಾಪನೆಯಾದಾಗ ಮಾತ್ರ ಡಾ. ರಾಧಾಕೃಷ್ಣನ್ ಅವರ ಕನಸು ನನಸಾಗಲಿದೆ. ಈ ಶಿಕ್ಷಕರ ದಿನಾಚರಣೆಯು ಕೇವಲ ಆಚರಣೆಯಾಗದೆ, ಶಿಕ್ಷಕರ ತ್ಯಾಗ, ಶ್ರಮ ಮತ್ತು ಸ್ಥಾನಮಾನವನ್ನು ಮತ್ತೊಮ್ಮೆ ಎತ್ತಿಹಿಡಿಯುವ ಸಂಕಲ್ಪವಾಗಲಿ.

ಶಿಕ್ಷಕರಿಗೆ ಸಲ್ಲುವ ಗೌರವವು ಸುಸ್ಥಿರ ಸಮಾಜದ ನಿರ್ಮಾಣಕ್ಕೆ ಅಡಿಪಾಯವಾಗಲಿದೆ ಎಂಬುದರಲ್ಲಿ ಸಂದೇಹವಿಲ್ಲ.

ವಿದ್ಯಾರ್ಥಿಗಳಿಗೆ ಸಂದೇಶ

ಈಗಿನ ವಿದ್ಯಾರ್ಥಿಗಳು ಸಹ ಶಿಕ್ಷಕರಿಗೆ ಗೌರವ ನೀಡಿ, ಅವರನ್ನು ಒಳ್ಳೆಯ ಭಾವನೆಯಿಂದ ಕಾಣಬೇಕು.

“ಗುರುವಿನ ಗುಲಾಮನಾಗುವ ತನಕ ದೊರೆಯದಣ್ಣ ಮುಕ್ತಿ” ಎಂಬ ನುಡಿಮುತ್ತು ಕೇವಲ ಮಾತಲ್ಲ, ಅದು ಜೀವನದ ಸತ್ಯ. ಸಮಾಜದಲ್ಲಿ ಸತ್ಪ್ರಜೆಗಳಾಗಿ ಬೆಳೆಯಲು ಗುರುಗಳ ಮಾರ್ಗದರ್ಶನ ಅನಿವಾರ್ಯ ಎಂಬುದನ್ನು ಪ್ರತಿಯೊಬ್ಬ ವಿದ್ಯಾರ್ಥಿಯೂ ಅರಿಯಬೇಕು.

– ಪಬ್ಲಿಕ್ ಸಮಾಚಾರ ವಾಹಿನಿ ವಿಶೇಷ ವರದಿ