ಟೋಕಿಯೋ: ಜಗತ್ತನ್ನು ತತ್ತರಿಸಿದ COVID-19 ಸಾಂಕ್ರಾಮಿಕದ ದುಃಸ್ವಪ್ನ ಇನ್ನೂ ಮಾಸಿಲ್ಲ. ಈ ಮಧ್ಯೆ, ಜಪಾನ್ನಲ್ಲಿ ಕಾಲೋಚಿತ ಇನ್ಫ್ಲುಯೆಂಜಾ (ಸಾಮಾನ್ಯವಾಗಿ ಫ್ಲೂ ಎಂದು ಕರೆಯಲಾಗುವ ಜ್ವರ) ಪ್ರಕರಣಗಳು ಹಠಾತ್ ಏರಿಕೆ ಕಂಡಿದ್ದು, ದೇಶವು ಮತ್ತೊಂದು ಆರೋಗ್ಯ ಬಿಕ್ಕಟ್ಟಿನ ಭೀತಿಯನ್ನು ಎದುರಿಸುತ್ತಿದೆ. ಒಂದೇ ವಾರದಲ್ಲಿ 4,000ಕ್ಕೂ ಹೆಚ್ಚು ಪ್ರಕರಣಗಳು ವರದಿಯಾಗಿದ್ದು, ದೇಶಾದ್ಯಂತ ಸಾಂಕ್ರಾಮಿಕ ರೋಗದ ತುರ್ತು ಪರಿಸ್ಥಿತಿಯನ್ನು ಘೋಷಿಸಲಾಗಿದೆ.
ಐದು ವಾರ ಮುಂಚಿತವಾಗಿ ಏಕಾಏಕಿ ಏರಿಕೆ
ಮಾಹಿತಿ ಪ್ರಕಾರ, ಜಪಾನ್ನಲ್ಲಿ ಈ ವರ್ಷ ಕಾಲೋಚಿತ ಇನ್ಫ್ಲುಯೆಂಜಾ ಜ್ವರವು ಸಾಮಾನ್ಯಕ್ಕಿಂತ ಸುಮಾರು ಐದು ವಾರಗಳ ಮುಂಚಿತವಾಗಿ ಕಾಣಿಸಿಕೊಂಡಿದೆ. ಕೇವಲ ಒಂದು ವಾರದ ಅವಧಿಯಲ್ಲಿ 4,030 ಕ್ಕೂ ಹೆಚ್ಚು ಪ್ರಕರಣಗಳು ವರದಿಯಾಗಿದ್ದು, ಇದು ಸಾಂಕ್ರಾಮಿಕ ರೋಗದ ಮಿತಿಯನ್ನು (Epidemic Threshold) ದಾಟಿದೆ. ಈ ಹಠಾತ್ ಏಕಾಏಕಿ ಏರಿಕೆ ರಾಷ್ಟ್ರವ್ಯಾಪಿ ಫ್ಲೂ ಸಾಂಕ್ರಾಮಿಕ ರೋಗದ ಪರಿಸ್ಥಿತಿಯನ್ನು ಉಂಟುಮಾಡಿದೆ.
ಶಾಲೆಗಳು ಬಂದ್, ಆಸ್ಪತ್ರೆಗಳಲ್ಲಿ ರೋಗಿಗಳ ದಟ್ಟಣೆ
ರೋಗದ ತೀವ್ರತೆ ಮತ್ತು ವ್ಯಾಪಕತೆಯನ್ನು ನಿಯಂತ್ರಿಸುವ ಸಲುವಾಗಿ ಜಪಾನ್ನಲ್ಲಿ ಈಗಾಗಲೇ 135 ಕ್ಕೂ ಹೆಚ್ಚು ಶಾಲೆಗಳನ್ನು ಮುಚ್ಚಲಾಗಿದೆ. ಶಾಲಾ-ಕಾಲೇಜುಗಳನ್ನು ಬಂದ್ ಮಾಡಿರುವುದಲ್ಲದೇ, ದೇಶಾದ್ಯಂತ ಗಡಿಯಲ್ಲಿ ನಿಗಾ ವಹಿಸಲಾಗಿದೆ. ವರದಿಯಾದ ಸುಮಾರು 4,000ಕ್ಕೂ ಅಧಿಕ ಜನರು ಆಸ್ಪತ್ರೆಗಳಲ್ಲಿ ದಾಖಲಾಗಿದ್ದು, ವೈದ್ಯಕೀಯ ವ್ಯವಸ್ಥೆಯ ಮೇಲೆ ಒತ್ತಡ ಹೆಚ್ಚಿಸಿದೆ.
ಜಾಗತಿಕ ಪ್ರಯಾಣ ಮತ್ತು ಚಿಕಿತ್ಸೆಗೆ ಪ್ರತಿರೋಧ ಶಕ್ತಿ ಹೆಚ್ಚುತ್ತಿರುವುದರಿಂದ ಈ ವೈರಸ್ ವೇಗವಾಗಿ ಹರಡುತ್ತಿರಬಹುದು ಎಂದು ಆರೋಗ್ಯ ತಜ್ಞರು ಎಚ್ಚರಿಸಿದ್ದಾರೆ. ಕೋವಿಡ್-19 ನಂತರ ಚೇತರಿಸಿಕೊಳ್ಳುತ್ತಿದ್ದ ಜಪಾನ್ಗೆ ಈ ಹೊಸ ಆರೋಗ್ಯ ಬಿಕ್ಕಟ್ಟು ಪ್ರಮುಖ ಸವಾಲನ್ನು ಒಡ್ಡಿದೆ.
ಸದ್ಯ ಪರಿಸ್ಥಿತಿ ನಿಯಂತ್ರಿಸಲು ಅಧಿಕಾರಿಗಳು ಕ್ರಮಗಳನ್ನು ಕೈಗೊಂಡಿದ್ದರೂ, ನಾಗರಿಕರು ಎಚ್ಚರದಿಂದ ಇರಲು ಮತ್ತು ರೋಗ ಹರಡದಂತೆ ಮುನ್ನೆಚ್ಚರಿಕೆ ವಹಿಸಲು ಸೂಚಿಸಲಾಗಿದೆ. ಈ ಸಾಂಕ್ರಾಮಿಕ ರೋಗವು ಮತ್ತೊಂದು ದೊಡ್ಡ ‘ಜಾಗತಿಕ ಸ್ಥಗಿತಗೊಳಿಸುವಿಕೆ’ಗೆ ಕಾರಣವಾಗಬಹುದೇ ಎಂಬ ಆತಂಕ ಸಾರ್ವಜನಿಕರಲ್ಲಿ ಮನೆಮಾಡಿದೆ.
