ಬೀದರ್: ಬದುಕು ಜಟಕಾಬಂಡಿ, ವಿಧಿ ಅದರ ಸಾಹೇಬ ಎಂಬ ಮಾತು ಎಷ್ಟು ಕಟು ಸತ್ಯ ಎಂಬುದಕ್ಕೆ ಬೀದರ್‌ನ ಇಬ್ಬರು ಆಪ್ತ ಗೆಳೆಯರ ದಾರುಣ ಅಂತ್ಯವೇ ಸಾಕ್ಷಿಯಾಗಿದೆ. ನಿನ್ನೆ ಮೊನ್ನೆಯವರೆಗೂ ನಗುನಗುತ್ತಾ ಕನಸುಗಳನ್ನು ಹೊತ್ತು ತಿರುಗಾಡುತ್ತಿದ್ದ ಸಾಯಿ ಕಿರಣ್ ಹಾಗೂ ನಾಗೇಶ್, ಹೊಸ ಬೈಕ್‌ನಲ್ಲಿ ಊರಿಗೆ ಮರಳುವಾಗ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿರುವ ಘಟನೆ ಕುಟುಂಬಸ್ಥರು ಹಾಗೂ ಸ್ನೇಹಿತರಲ್ಲಿ ಆಘಾತ ಮೂಡಿಸಿದೆ.
ಬೀದರ್‌ನ ಒಂದೇ ಗಲ್ಲಿಯಲ್ಲಿ ಹುಟ್ಟಿ, ಜೊತೆಯಾಗಿಯೇ ಆಡಿ ಬೆಳೆದ ಸಾಯಿ ಕಿರಣ್ ಹಾಗೂ ನಾಗೇಶ್ ಜೀವದ ಗೆಳೆಯರಾಗಿದ್ದರು. ಒಬ್ಬರನ್ನೊಬ್ಬರು ಬಿಟ್ಟಿರದಷ್ಟು ಗಾಢವಾಗಿದ್ದ ಇವರ ಸ್ನೇಹ, ಸಾವಿನಲ್ಲೂ ಜೊತೆಯಾಗುವಂತಾಗಿದೆ. ಬಡ ಕುಟುಂಬದ ಜವಾಬ್ದಾರಿ ಹೊತ್ತಿದ್ದ ಸಾಯಿ ಕಿರಣ್ ಮೊಬೈಲ್ ಶಾಪ್‌ನಲ್ಲಿ ಕೆಲಸ ಮಾಡುತ್ತಿದ್ದರೆ, ನಾಗೇಶ್ ಹಾಲಿನ ಡೈರಿಯಲ್ಲಿ ದುಡಿಯುತ್ತಿದ್ದರು.
ಇಬ್ಬರಿಗೂ ಹೆಚ್ಚು ಸಿಸಿ ಸಾಮರ್ಥ್ಯದ ಬೈಕ್‌ನಲ್ಲಿ ಊರಿನಲ್ಲಿ ಸುತ್ತಾಡಬೇಕೆಂಬ ಆಸೆಯಿತ್ತು. ಸಾಯಿ ಕಿರಣ್ ಬಳಿ ಈಗಾಗಲೇ ಎಕ್ಸ್‌ಪಲ್ಸ್-200 ಬೈಕ್ ಇತ್ತು. ತನ್ನ ಗೆಳೆಯ ನಾಗೇಶ್‌ಗೂ ಇದೇ ಮಾದರಿಯ ಬೈಕ್ ಕೊಡಿಸಬೇಕೆಂಬ ಹಂಬಲ ಹೊಂದಿದ್ದ ಸಾಯಿ ಕಿರಣ್, ಕಷ್ಟಪಟ್ಟು ಕೂಡಿಟ್ಟಿದ್ದ ₹1.20 ಲಕ್ಷ ಹಣದೊಂದಿಗೆ ಸೆಕೆಂಡ್‌ಹ್ಯಾಂಡ್ ಬೈಕ್ ಖರೀದಿಸಲು ನಾಗೇಶ್ ಜೊತೆ ಮಂಡ್ಯಕ್ಕೆ ತೆರಳಿದ್ದರು.
ಅಂದುಕೊಂಡಂತೆ ತಿಂಗಳ 6ರಂದು ಮಂಡ್ಯದಲ್ಲಿ ಬೈಕ್ ಖರೀದಿಸಿದ ಇಬ್ಬರು ಸ್ನೇಹಿತರು, ಅಲ್ಲಿಂದ ಬೆಂಗಳೂರಿಗೆ ತೆರಳಿ ಸ್ನೇಹಿತರನ್ನು ಭೇಟಿಯಾಗಿದ್ದರು. ಬೆಂಗಳೂರಿನಲ್ಲಿ ಒಂದು ದಿನ ತಂಗಿ ಆದಿಯೋಗಿ ದರ್ಶನವನ್ನೂ ಪಡೆದಿದ್ದರು. ಬಳಿಕ ಹೊಸದಾಗಿ ಖರೀದಿಸಿದ ಬೈಕ್‌ನಲ್ಲಿ ತಮ್ಮೂರಿನತ್ತ ಸಂತಸದಿಂದ ಪ್ರಯಾಣ ಆರಂಭಿಸಿದ್ದರು. ಆದರೆ, ಇದೇ ತಮ್ಮ ಜೀವನದ ಕೊನೆಯ ಪಯಣವಾಗಲಿದೆ ಎಂಬುದನ್ನು ಅವರು ಊಹಿಸಿರಲಿಲ್ಲ.
ಬೆಂಗಳೂರು ಬಿಟ್ಟು ಬೀದರ್‌ನತ್ತ ಸಾಗುತ್ತಿದ್ದಾಗ ತೆಲಂಗಾಣದ ಸಂಗಾರೆಡ್ಡಿ ಸಮೀಪ ಬೀದರ್-ಹೈದರಾಬಾದ್ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಭೀಕರ ರಸ್ತೆ ಅಪಘಾತ ಸಂಭವಿಸಿದೆ. ಅಪಘಾತದಲ್ಲಿ ಸಾಯಿ ಕಿರಣ್ ಹಾಗೂ ನಾಗೇಶ್ ಮೃತಪಟ್ಟಿದ್ದು, ಇಬ್ಬರು ಗೆಳೆಯರ ಹೊಸ ಬೈಕ್‌ನ ಕನಸು ರಕ್ತದ ಮಡುವಿನಲ್ಲಿ ನುಚ್ಚುನೂರಾಗಿದೆ.
ಮಗ ಮನೆಗೆ ಮರಳುತ್ತಾನೆ ಎಂದು ಎದುರು ನೋಡುತ್ತಿದ್ದ ತಾಯಿಯ ಆಕ್ರಂದನ ಹಾಗೂ ಕುಟುಂಬಸ್ಥರ ಕಣ್ಣೀರು ಮನಕಲಕುವಂತಿದೆ. ಒಂದೇ ಗಲ್ಲಿಯಲ್ಲಿ ಹುಟ್ಟಿ, ಜೊತೆಯಾಗಿ ಬೆಳೆದು, ಬದುಕಿನ ಪ್ರತಿಯೊಂದು ಹೆಜ್ಜೆಯಲ್ಲೂ ಜೊತೆಯಾಗಿದ್ದ ಇಬ್ಬರು ಗೆಳೆಯರು ಸಾವಿನಲ್ಲೂ ಜೊತೆಯಾಗಿಯೇ ಬದುಕಿನ ಪಯಣ ಮುಗಿಸಿರುವುದು ವಿಧಿಯ ಕ್ರೂರ ಆಟಕ್ಕೆ ಸಾಕ್ಷಿಯಾಗಿದೆ.
ಇಬ್ಬರು ಯುವಕರ ಅಕಾಲಿಕ ನಿಧನಕ್ಕೆ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಸೇರಿದಂತೆ ಹಲವು ಗಣ್ಯರು ಕಂಬನಿ ಮಿಡಿದಿದ್ದಾರೆ. ಹೊಸ ಬೈಕ್ ಏರಿ ಊರಿನ ಸುತ್ತಮುತ್ತ ಸಂಭ್ರಮದಿಂದ ಸುತ್ತಾಡಬೇಕೆಂಬ ಹರೆಯದ ಕನಸುಗಳು ಅರ್ಧ ದಾರಿಯಲ್ಲೇ ಮಣ್ಣಾಗಿದ್ದು, ಕುಟುಂಬಸ್ಥರು ಹಾಗೂ ಸ್ನೇಹಿತರಲ್ಲಿ ತೀರಲಾರದ ನೋವು ಉಳಿದಿದೆ.
