ಧಾರವಾಡ : ನಗರದ ಜುಬಲಿ ಸರ್ಕಲ್ನಲ್ಲಿ ಗುರುವಾರದಂದು ಪತ್ರಿಕಾ ವಿತರಕರು ಕೇಕ್ ಕತ್ತರಿಸುವ ಮೂಲಕ ಪತ್ರಿಕಾ ದಿನವನ್ನು ಸಂಭ್ರಮದಿಂದ ಆಚರಿಸಿದರು. ತಮ್ಮ ಹಲವು ಬೇಡಿಕೆಗಳನ್ನು ಸರ್ಕಾರದ ಮುಂದೆ ಇಟ್ಟರು. ಈ ಸಮಯದಲ್ಲಿ ಪತ್ರಿಕಾ ವಿತರಕರ ಒಕ್ಕೂಟದ ಹಿರಿಯ ವಿತರಕರಾದ ನಾಗರಾಜ ಕುಲಕರ್ಣಿ ಹಾಗೂ ಸುರೇಶ ಸುಣಗಾರ ಅವರು ಪತ್ರಿಕೆಗಳ ಮಾಲೀಕರು, ಸಿಬ್ಬಂದಿ ಮತ್ತು ಸರ್ಕಾರಕ್ಕೆ ತಮ್ಮ ಅಹವಾಲುಗಳನ್ನು ಸಲ್ಲಿಸಿದರು.
ವಿತರಕರನ್ನು ಕಡೆಗಣಿಸಬೇಡಿ: ನಾಗರಾಜ ಕುಲಕರ್ಣಿ
ಕನ್ನಡ ಪತ್ರಿಕೋದ್ಯಮಕ್ಕೆ 200 ವರ್ಷಗಳ ಸುದೀರ್ಘ ಇತಿಹಾಸವಿದೆ ಎಂದು ಸ್ಮರಿಸಿದ ನಾಗರಾಜ ಕುಲಕರ್ಣಿ ಅವರು, ‘ಮಂಗಳೂರು ಸಮಾಚಾರ’ ಕನ್ನಡದ ಮೊದಲ ಪತ್ರಿಕೆ ಎಂದು ಹೇಳಿದರು. ಪತ್ರಿಕೋದ್ಯಮದ ಆರಂಭದಿಂದಲೂ ವಿತರಕರು ನಿರಂತರವಾಗಿ ವರ್ಷದ 365 ದಿನಗಳೂ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಅನೇಕ ವಿತರಕರು ತಮ್ಮ ಕೆಲಸದ ಜೊತೆಗೆ ಉತ್ತಮ ವಿದ್ಯಾಭ್ಯಾಸ ಮಾಡಿ ಸಮಾಜದಲ್ಲಿ ಉನ್ನತ ಸ್ಥಾನ ಗಳಿಸಿದ್ದಾರೆ. ಆದರೂ, ವಿತರಕರನ್ನು ಕಡೆಗಣಿಸಲಾಗುತ್ತಿದೆ ಎಂದು ಅವರು ವಿಷಾದ ವ್ಯಕ್ತಪಡಿಸಿದರು.
ಯಾವುದೇ ರೀತಿಯ ಸೌಲಭ್ಯಗಳಿಲ್ಲದೆ ಮತ್ತು ಪ್ರಚಾರವಿಲ್ಲದೆ ವಿತರಕರು ತಮ್ಮ ಕೆಲಸವನ್ನು ನಿರಂತರವಾಗಿ ನಡೆಸುತ್ತಿದ್ದಾರೆ. ಸರ್ಕಾರಗಳು ಈ ಸಮಸ್ಯೆಗೆ ಸ್ಪಂದಿಸುತ್ತಿದ್ದರೂ ಅದು ಸಾಕಾಗುತ್ತಿಲ್ಲ. ಇಡೀ ಭಾರತದಲ್ಲಿ ಸುಮಾರು 50 ಲಕ್ಷ ಪತ್ರಿಕಾ ವಿತರಕರು ಇದ್ದಾರೆ, ಆದರೆ ಅವರಿಗೆ ಯಾವುದೇ ರೀತಿಯ ಸೌಲಭ್ಯಗಳಿಲ್ಲ. ಈ ಬಗ್ಗೆ ಸರ್ಕಾರ ಗಮನಹರಿಸಬೇಕು. ವಿತರಕರ ಕಲ್ಯಾಣಕ್ಕಾಗಿ ₹50 ಕೋಟಿ ಫಂಡ್ ಇಟ್ಟು, ಒಂದು ಅಕಾಡೆಮಿ ಸ್ಥಾಪಿಸಿ, ಎಲ್ಲಾ ರೀತಿಯ ಅನುಕೂಲಗಳನ್ನು ಕಲ್ಪಿಸಬೇಕು ಎಂದು ಅವರು ಆಗ್ರಹಿಸಿದರು.
ಧಾರವಾಡದಲ್ಲಿ ಸುಮಾರು 500 ಪತ್ರಿಕಾ ವಿತರಣಾ ಸಿಬ್ಬಂದಿ ಇದ್ದಾರೆ. ಅವರಿಗೆ ಯಾವುದೇ ರೀತಿಯ ಸೌಲಭ್ಯಗಳು, ನೋಂದಣಿ ಅಥವಾ ಗುರುತಿಸುವಿಕೆ ಇಲ್ಲ. ಆದ್ದರಿಂದ, ಧಾರವಾಡದ ಮಹಾನಗರ ಪಾಲಿಕೆಯು ವಿತರಕರ ನೆರವಿಗೆ ಬರಬೇಕು. ಅಪಘಾತ, ವಿದ್ಯಾಭ್ಯಾಸ ಹಾಗೂ ಆರೋಗ್ಯ ಸಮಸ್ಯೆಗಳ ಸಂದರ್ಭದಲ್ಲಿ ಸಹಾಯ ಮಾಡಲು ₹1 ಕೋಟಿ ಫಂಡ್ ಮೀಸಲಿಡಬೇಕು ಎಂದು ಕುಲಕರ್ಣಿ ಮನವಿ ಮಾಡಿದರು.
ಇ-ಶ್ರಮ್ ಕಾರ್ಡ್ ಸೌಲಭ್ಯ ಪಡೆಯಲು ಮನವಿ: ಸುರೇಶ ಸುಣಗಾರ
ಪತ್ರಿಕಾ ದಿನಾಚರಣೆಯನ್ನು ಆಯೋಜಿಸಿದ ಎಲ್ಲರಿಗೂ ಧನ್ಯವಾದ ತಿಳಿಸಿದ ಸುರೇಶ ಸುಣಗಾರ ಅವರು, ಮಳೆ, ಗಾಳಿ, ಚಳಿ, ಬಿಸಿಲು ಲೆಕ್ಕಿಸದೆ ಪತ್ರಿಕೆ ಹಂಚುವ ಕೆಲಸವನ್ನು ವಿತರಕರು ನಿರ್ವಹಿಸುತ್ತಾರೆ. ಅವರ ಕಷ್ಟಗಳನ್ನು ಸರ್ಕಾರ ಮನಗಂಡು ಬೇಡಿಕೆಗಳನ್ನು ಈಡೇರಿಸಬೇಕು ಎಂದು ಹೇಳಿದರು.
ಪತ್ರಿಕಾ ವಿತರಕರ ಸಂಘವನ್ನು ಇಡೀ ಕರ್ನಾಟಕದಲ್ಲಿ ಸ್ಥಾಪಿಸಲಾಗಿದೆ. ರಾಜ್ಯ ಸರ್ಕಾರದಿಂದ ‘ಇ-ಶ್ರಮ್ ಕಾರ್ಡ್’ ಯೋಜನೆ ಜಾರಿಗೆ ಬಂದಿದ್ದು, ಈ ಯೋಜನೆಯು ಸಂಘದ ಮೂಲಕ ವಿತರಣೆಯಾಗುತ್ತಿದೆ. ಕರ್ನಾಟಕದಲ್ಲಿರುವ ಎಲ್ಲ ಪತ್ರಿಕಾ ವಿತರಕರು ಈ ಕಾರ್ಡ್ಗಳನ್ನು ಸದುಪಯೋಗಪಡಿಸಿಕೊಳ್ಳಬೇಕು ಎಂದು ಅವರು ಮನವಿ ಮಾಡಿದರು.
ಪತ್ರಿಕೆಗಳ ಮಾಲೀಕರು ಮತ್ತು ಸಿಬ್ಬಂದಿ ವರ್ಗದವರು ವಿತರಕರ ಮೇಲೆ ಕರುಣೆ ಇಟ್ಟು, ಅವರಿಗೆ ಸಿಗಬಹುದಾದ ಸರ್ಕಾರಿ ಸೌಲಭ್ಯಗಳು ಮತ್ತು ಯೋಜನೆಗಳನ್ನು ಒದಗಿಸುವಲ್ಲಿ ಸಹಾಯ ಮಾಡಬೇಕು. ವಿತರಕರನ್ನು ನಿರ್ಲಕ್ಷಿಸದೆ, ಅವರ ಹಿತಾಸಕ್ತಿಗಳನ್ನು ಕಾಪಾಡಬೇಕು ಎಂದು ಅವರು ಪತ್ರಿಕೆಗಳ ಮಾಲೀಕರನ್ನು ಕೋರಿದರು.
ಈ ಸಂದರ್ಭದಲ್ಲಿ ಶಿವಪ್ರಸಾದ್ ಹಲಗಿ, ಕೃಷ್ಣಾ ಕುಲಕರ್ಣಿ, ಶೇಖರ ಬೆಲೂರ, ಶಿವರಾಮ ಶಿರಗುಪ್ಪಿ, ಪತ್ರೇಶ್ ಇಂಗದಾಳ, ಬಸವರಾಜ ಗೊಂದಿ, ವೆಂಕಟೇಶ ಮೊದಲಿಯಾರ, ಗಜಾನನ ಭಟ್, ಮನೋಹರ ಮಠಪತಿ, ಶಶಿ ಕಬ್ಬೂರ, ರಾಜು ಮಂಟೆದ, ರವಿ ಮಲ್ಲಿಗವಾಡ, ಮಂಜು ಹಿರೇಮಠ, ಗಿರೀಶ ಮ್ಯಾಗೇರಿ, ಜಿಶಾನ ಬಾದಾಮಿ, ಜಗದೀಶ್ ಅವಗಾನ, ನಿರಂಜನ, ಕಾರ್ತಿಕ, ಅಸ್ಲಂ, ಮಲ್ಲು, ಶಶಿಕಾಂತ ನೀಲಾಕರಿ, ಮಂಜು ಕಠಾರೆ ಸೇರಿದಂತೆ ಅನೇಕ ವಿತರಕರು ಭಾಗವಹಿಸಿದ್ದರು.
